Maamulka Gobolka Bakool oo ku wajahan deegaanka Garasweyne

Maamulka gobolka Bakool iyo saraakiisha ciidamada xoogga dalka oo kaashanaya kuwa Nabad Ilaalinta Midowga Afrika ee AMISOM ayaa lagu wadaa inay gaaraan deegaanka Garasweyne oo qiyaastii 50 Km dhanka Galbeed uga beegan magaalada Xudur ee xarunta Gobolka Bakool.

Maamulka ayaa qorsheynaya in magaaladaasi ay kulamo kula qaaataan odoyaasha dhaqanka iyo waxgaradka deegaanka, kuwaasi oo ay kala hadlayaan xaaladda deegaanka iyo sidii dhallinyarada looga wacyi gelin lahaa inay ka waantoobaan fikirka qaldan ee Al-Shabaab.

Wariyaha Warbaahinta Qaranka ee Gobolka Bakool Maxamed Xasan Cabdiraxmaan ayaa ku soo waramay in deegaanka Garasweyne ay ku suganyihiin 18 ka tirsan maleeshiyada Al-Shabaab oo isu soo dhiibay gacanta ciidamada dowladda ee halkaasi ku sugan, kuwaasi oo la doonayo in la keeno magaalada Xudur ee xarunta gobolka Bakool.

Ciidamada xoogga dalka oo kaashanaya kuwa Nabad Ilaalinta Midowga Afrika ee AMISOM oo si rasmi ah ula wareegay dhamaan deegaannada uu ka koobanyahay Gobolka Bakool, ayaa sababtay in maleeshiyaadka Al-Shabaab ay isu soo dhiibaan gacanta ciidamada dowladda, taasi oo ka dambeysay baaq ay maamulka gobolka u jeediyeen maleeshiyaadka la marin habaabiyay ee kooxda Shabaab.

 

LEAVE A REPLY

Please enter your comment!
Please enter your name here