Maamulka Gobolka Banaadir oo kulan duco ah u sameeyay Shuhaddada dhacdadii 24-July 2019 “SAWIRRO”

Guddoomiyaha Gobolka Banaadir Ahna Duqa magaalada Muqdisho Mudane Cumar Maxamuud Maxamed (Cumar Filish) Ku-xigeenada Gobolka Banaadir, Xoghayaha Guud, Culima’udiin, Agaasimeyaal, Guddoomiyeyaal Degmo iyo Ehelo ayaa maanta xarunta Aqalka Dowladda Hoose ee Xamar kaga qeyb-galay Xus iyo Duco loo sameeyay Shuhaddadii ku Shahiiday Musiibadii 24 July 2019 ka dhacday Xarunta Aqalka Dowladda Hoose ee Xamar oo uu ugu horeeyay Guddoomiyihii Gobolka Banaadir Ahaana Duqii Muqdisho AUN Cabdiraxmaan Cumar Cusmaan (Eng. Yariisow) Agaasimeyaal, La-taliyeyaal iyo Guddoomiyeyaal Degmo.

Munaasabadaan Xuska iyo Ducada ayaa laga jeediyay khudbado isugu jiray wacdi Diini ah, Isbaraarujin, Taariikh Xusuuseed iyo Duco, iyadoo ugu danbeyn uu halkaasi khudbad ka jeediyay Guddoomiyaha Gobolka Banaadir Ahna Duqa Muqdisho Mudane Cumar Maxamuud Maxamed (Cumar Filish) oo sheegay in xuskaan uu noqon doono mid sanad weliba la xusi doono, si loo weyneeyo Shuhaddadii ku Shahiiday Xarunta Aqalka Dowladda Hoose ee Xamar 24 July 2019, iyagoo bulshadooda u adeegaya.

Gaba-gabadii Munaasabada Xuska iyo Ducada kadib ayuu Guddoomiyaha Gobolka Banaadir Mudane Cumar Filish waxa uu xafiiskiisa ku qaabilay Ehelada Shuhaddadii, Asigoo mid mid u xaal wareystay maadaama Maamulka Gobolka Banaadir uu si gooni ah ugu warhaayo Ehelada Shuhaddada.

Xuskaan oo ah sanadkii 2-aad ayaa lagu wadaa in 1-da Augosto lagu soo gaba-gabeeyo Garoonka Kubadda Cagta ee Eng. Yariisow Stadium.