Macalimiin tabbabar loo soo xiray si ay wax u baraan carruurta aan lixaadkooda dhameystirneyn “SAWIRRO”

Munaasabadaan oo aheyd mid tababar loogu soo xirayay ku dhawaad boqol arday  oo bartay luuqada wax lagu baro dadka aan wax maqli karin si ay u helaan waxbarasho  la mid ah mid ay helaan kuwa wax maqli kara ayaa maanta lagu qabtay magaalada Galkacyo.

 

Munaasabada oo ay ka qeyb galeen mas’uuliyiin iyo xubno ka socday bulshada qeybahooda kala duwan ayaa waxaa ugu horeyn ka hadlay Maamulaha Dugsiga Dhagoolayaasha ee Galkacyo Cabdiraxmaan Axmed Kaarshe oo ka warbixiyay dadaalka ay u mareen in waxbarasho ay helaan carruurta aan wax maqli karin,( Kuwa maqal la’) waxaana uu sheegay in markii ay arkeen baahiyada ay qabaan carruurta dhagoolayaashaa ay u istaageen sidii loogu heli lahaa waxbarasho, taas oo uu xusay in dadaal dheer kadib ay u suurtagashay in ay furaan dugsi hoose Dhexe oo wax lagu baro carruurtaasi inkastoo uu sheegay in ay jiraan caqabado ku aadan dhanka goobta waxbarshada iyo agabkii wax lagu bari lahaa iyo sidooo kale mushaarkii macalimiinta.

Macalin Muuse Xasan Kadle oo ah macalinka tababarka siinayay ardayda la baray luuqada wax lagu baro dhagoolayaasha ayaa sharaxaad ka bixiyay sida wax loo bari karo carruurta aan wax maqli karin, isagoo sheegay in ay tahay mid fudud sidaa darteedna waalidiinta looga baahanyahay in carruurta dhagoolayaasha ay wax baraan, taas oo uu sheegay in ay xaq u leeyihiin waxaa sidoo kale Macalin Muuse uu ka codsaday Shirkadaha iyo Ganacsatadu in ka qeyb qaataan wax barida carruurta aan wax maqli karin ama kuwa lixaadkoodu kala dhiman yahay.

Guddoomiye Ku xigeenka Jaamacadda Galkacyo Muxyadiin Cabdullaahi Cabdi oo isna munaasabada ka hadlay ayaa sharaxay kaalinta ay ka qaateen tababarida macalimiinta la qorsheynayo in ay wax baraan carruurta aan wax maqli karin iyo xaqqa ay u leeyihiin in ay waxbarasho helaan, isagoo sheegay in Jaamacaddu ay bixineyso dhaqaalaha qaar ka mid ah macalimiinta wax baraya carruurtaasi muddo hal sano ah.

Sidoo kale munaasabada ayaa waxaa hadalo ka soo jeediyay qaar ka mid ah mas’uuliyiinti iyo bulshadii ka qeyb gashay kuwaas oo ay ka mid ahaayeen duqa Degmada Galkacyo, Xildhibaan Zahra Daadhir Mire oo si wada jir ah u sheegay in ay kaalin ka qaadan doonaan waxbarida carruurta aan wax maqli karin.

Gunaanadkii munaasabadda waxaa ka hadlay isku duwaha Wasaaradda Waxbarshada Galmudug Axmed Jaamac Aadan Qoodeey oo xusay in Wasaaradda Waxbarshadu ay mar kasta u taagantahay wax ka qabshada baahiyada Waxbarshada.

Munaasabadaan ayaa ujeedka loo qabtay waxa ay aheyd in lagu dhiiri galiyo bulshada wax barida carruurta aan laxaadkoodu dhameystirneyn gaar ahaan kuwa dhagoolayaashaa si ay u helaan xaquuqda ay helaan carruurta la midka ah.

 

Did you like this? Share it:

1 COMMENT

LEAVE A REPLY

Please enter your comment!
Please enter your name here