Madaxda Qaranka oo hadalo dar daaran ah u jeediyay kumanaan dadweyne ah oo isugu soo baxay Caasimadda “SAWIRRO”

2664

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo, Guddoomiyaha Aqalka sare Mudane Cabdi Xaashi Cabdullaahi iyo Ra’iisul wasaaraha XFS Mudane Xasan Cali Khayre ayaa ka qeybgalay bannaan bax ballaaran oo looga soo horjeeday dhibaatooyinka ay shacabka ku hayaan maleeshiyada Al-Shabaab iyo qarixii Soobe, kaasi oo ka dhacay Garoonka kubadda Cagta ee Kooonis ee magaalada Muqdisho.

Mas’uuliyiinta ayaa khudbad u jeediyay shacabkii ka qeybgalay dibad baxa, iyagoo ku booriyay in ay muujiyaan isku duubni si loo wajoho ka hortaga khataraha uu cadowgu u soo maleego Ummadda Soomaaliyeed.

Ra’iisul Wasaraah Xukuumadda Federaalka Soomaaliya Mudane Xasan Cali Khayre ayaa sheegay in lagu soo duuley jiritaanka Ummadda Soomaaliyeed, wuxuuna ka codsaday shacabka in waxkasta meel la iska dhigo, loona soo jeesto xoreynta Dalka.

“Waxaan codsanayaa inaan kuligeen wada istaagno oo aan u duceyno dadkii naga geeriyooday in ilaahay uu u naxariisto, Eehaladii iyo Ummadda Soomaaliyeed waxaan leenahay Ilaah samir iyo imaan ha idinka siiyo, sidii aan u duceysan aan u wada inkaarno, ilaahay baan u baryaynaa ma aflaxaan’ ayuu yiri Mudane Kheyre.

Ra’iisul Wasaare Kheyre ayaa uga mahadceliyay dadkii ka qeyb qaatay u gurmashada dadkii ay waxyeelada ka soo gaartay, isagoo xusay inay jiraan dhallinyaro ilaa iyo maalintii falku dhacay u taagan inay u adeegaan bulsahda, waxaana uu ugu dambeyn u mahadceliyay dowladihii u soo gurmaday shacabka.

“Waxaan rajeynayaa in14-kii bishan ay noqoto maalin ay Soomaaliya dib u dhalatay, waxaan sidaas ula jeedaa in ay noo taalo hal shaqo oo ah inaan dalkeena xoreyno, si aan dalkeena u xoreyno waa inaan qabyaaladda dhinac iska dhignaa, waa inaan nin jecleysiga dhinac iska dhignaa, waa in qof naga mid ah uusan qarinin Shabaab, qof Shabaab ah qofkii gabaad siiya waa dambiile” ayuu yiri Ra’iisul Wasaaraha Soomaaliya.

Ra’iisul Wasaaraha ayaa daboolka ka qaaday in Xukuumadda ay sameyn doonto qorshe lagula dagaalamayo argagixisada Al-Shabaab, iyadoo la kaashaneyso shacabka Soomaaliyeed.

Intaasi kadib ayaa waxaa halkaasi khudbad dheer oo khiiro gelisay shacabka Soomaaliyeed ka jeediyay Madaxweynaha Jamhuuriyadda Federaalka Soomaaliya Mudane Maxmed Cabdullaahi Farmaajo,oo siweyn uga hadlay khataraha bulshada ay ku hayaan maleeshiyada Shabaab shacabka Soomaaliyeed.

Madaxweyne Farmaajo ayaa ku dheeraaday kahadalka ahmiyadda ay leedahay in cadowga SHabaab laga difaaco dalka iyo dadka Soomaaliyeed,wuxuuna xusay in la sameynayo ciidamo loogu magac daray ciidamada difaaca Shacabka.

“Waxaan leeyahay carruurtii, Aabayaashii iyo hooyooyinkii ku dhintay qarixii 14kii bishan dhacay illaahay ha u naxriisto,gacan ka xaqdaran ayaa dishey,aan u duceyno in illhaahay naxriistiisa uu siiyo,intii dhaawacantayna uu bogsiiyo,dadkaasi waxay ahaayeen mujaahidiin,waa ay shahiideen,dalka dhibaatada in muddo ah kajirta waxaa sabab u ah inaga oo caasinay illaahay aan u towbad keeno oo aan cafisweydiisano inagana aan iscafino si aan u helno naxriista Alle”, Ayuu yiri Madaxweyne Farmaajo.

Madaxweynaha Soomaaliya ayaa u mahad celiyay dowladihii ka qeyb qaatay u gurmashada dadka Soomaaliyeed ee dhibaatadu gaartay,wuxuuna xusay in mar un loo abaal gudi doono,wuxuu sidoo kale ku ammaanay ciidamada Qaranka sida ay ugu istaageen howlaha gurmadka ah tan iyo malintii qaraxa uu dhacay,wuxuuna ku tilmaamay geesiyaad adag.

“14kii bishan waxay noqonaysa Taariikh madow oo Soomaaliya ay xusuusan doonto 100 sano ee soo socota,balse uu yiri waxay ku xiran tahay sida ay uga jawaabaan dhalinyarada Soomaaliyeed,waxaa la sameynayaa ciidamada difaaca shacabka waxaa lagu bilaabayaa 14 milyen oo dowladdu bixinayso,waxaana kow ka ah shaqaalaha Dowladda,ha la is qoro dalka hala difaaco”,ayuu yiri madaxweyne Farmaajo.

Ugu dambeyntii Madaxweynaha ayaa uga mahad celiyay ciidamada Amisom dowrka ay ka qaadanayaan difaaca dalka,balse wuxuu xusay in looga baahanyahay shacabka Soomaaliyeed in iyaga ay is difaacaan hubkuna ay qaataan si ay uga hortagaan dhagaraha cadowga.

 

Did you like this? Share it:

LEAVE A REPLY

Please enter your comment!
Please enter your name here