Madaxda Wasaaradda Warfaafinta oo heshiis cusbooneysiin ah la saxiixday Hay’adda Horumarinta Saxaafadda ee Dalka Finland “SAWIRRO”

1949

Madaxda Wasaaradda Warfaafinta, Dhaqanka iyo Dalxiiska ee Xukuumadda Soomaaliya iyo wakiilo ka socday Hay’adda horumarinta Warbaahinta Caalamka ee  dalka Finland ee magaceeda loo soo gaabiyo VIKAS ayaa maanta kala saxiixday heshiis cusbooneysiin ah oo ku aadan joogteynta tababarada ay siinayaan shaqaalaha Warabahinta Qaranka iyo qalabeynta Telefishinka Qaranka.

Sido kale Wakiilada Hay’ada VIKAS waxa ay madaxda Wasaarada guddoonsiiyeen qalab ay ugu talagaleen Telefishinka Qaranka, iyadoo munaasabadii heshiiska uu ka qeyb galay Sii-hayaha Xilka Wasiirka Warfaafinta ahna Wasiir ku-xigeenka Wasaaradda Warfaafinta Mudane Cabdiraxmaan Iidaan Yoonis, Agaasimaha Guud ee Wasaaradda Warfaafinta Mudane Cabdiraxmaan Yuusuf Sheekh Al-cadaala iyo qaar ka mid ah agaasimeyaasha Waaxyaha ee Wasaaradda.

Agaasimaha Telefishinka Qaranka Soomaaliyeed Mudane Liibaan Cabdi Cali oo ugu horeyn ka hadlay munaasabadda ayaa sheegay in ay heshiis cusbooneysiin ah oo ku aadan xoojinta wada shaqeynta la saxiixdeen Madaxda Hay’adda horumarinta Warbaahinta Caalamka ee  dalka Finland ee magaceeda loo soo gaabiyo VIKAS.

“Maanta axaan halkan ku wada saxiixanay cusbooneysiin oo ah heshiiskii wada shaqeyneyd ee horey nooga dhexeeyay, sidoo kale waxaan halkan ku saxiixnay oo aan ku guddoonay qalab ay noo keeneen Vikis iyo saaxiibada Finland nooga yimid, qalabkaas oo isugu jira ee kaamerooyin Istuudiyeyaasha loogu talagalay, oo wax badan ka badali doono shaqadeena iyo waxyaabo kale oo la xiriira oo Warbaahinta wax ka tari doono” ayuu yiri Agaasimaha Telefishinka Qaranka.

Eng, Andreas Wirth iyo Cabduweli Xasan Xaashi oo ka socday Hay’ada VIKAS ayaa sheegay in uu ku faraxsanyahay in markale ay cusbooneysiiyaan heshiiska.

Agaasimaha guud ee Wasaaradda Warfaafinta, Dhaqanka iyo Dalxiiska ee Wasaaradda Warfaafinta Mudane Cabdiraxmaan Sheekh Yuusuf Al-Cadaalla oo saxiixay heshiiska ayaa u mahad celiyay mas’uuliyiinta ka socotay Hay’adda VIKAS.

“Nimankan waxa ay qaateen qatar badan oo aysan qaadanin dadka iyaga oo kale ah, saacado badan ayay halkan nagula qaataan, maalmo badan ayay nala joogaan, waxa dhalinyaradeenu qabaan ayay la qabaan, marka runtii waxa ay noo muujiyeen, wax aysan dad badan noo muujin oo aysan dalal badan noo muujin, natiijadii ka dhalatay waxa ay tahay maanta inaan heysano faramayaqaano iyo wariyeyaal ay tababareen, oo xirfadlayaal ay ka dhigeen oo aqoon ku filan leh maanta.” ayuu yiri Agaasimaha Guud ee Wasaaradda Warfaafinta.

Sii-hayaha Xilka Wasiirka Warfaafinta ahna Wasiir ku-xigeenka Wasaaradda Warfaafinta Mudane Cabdiraxmaan Iidaan Yoonis ayaa sheegay in qalabkan uu waxbadan ka qaban doono baahiyaha shaqo ee Telefishinka Qaranka.

“Qalab waa qalab sida uu Injineerku noo sheegay, haddii banaanka loo baxayo iyo haddii halkan lagaga shaqeynayo, waa qalab tayo leh oo waxbadan ku soo kordhin doono Istuudiyeyaasha Wasaaraddu ay leedahay, marka aad iyo aad ayaad u mahadsantihiin, waan soo dhaweyneynaa xiriirka markale dib loo cusbooneysiiyay” ayuu yiri Sii-hayaha Xilka Wasiirka Warfaafinta.

Hay’adda Horumarinta Saxaafadda ee Dalka Finland ee magaceeda loo soo gaabiyo VIKAS ayaa horey tababaro kala duwan siisay qaar ka mid suxufiyiinta Warbaahinta Qaranka iyo kuwa kale oo aan dowli ahayn ee ka howlgalla caasimadda Soomaaliya ee Muqdisho.

 

Did you like this? Share it:

LEAVE A REPLY

Please enter your comment!
Please enter your name here