Madaxda Wasaaradda Warfaafinta oo kulan sagootin ah u sameeyay wafdi ka socday Finland “SAWIRRO”

1523

Siiyaha Wasiirka Warfaafinta ahna Wasiir ku-xigeenka Wasaaradda Warfaafinta Mudane Cabdiraxmaan Iidan Yoonis, Agaasimaha Guud ee Wasaaradda Warfaafinta Mudane Cabdiraxmaan Yuusuf Sheekh Al-Cadaalla, Agaasimah Maamulka iyo Maaliyada Mudane Cabdinaasir Xuseen Xasan, Agaasimaha Telefishinka Qaranka Mudane Liibaan Cabdi Cali, Agaasimaha Shaqada iyo horumarinta shaqaalaha Mudane Cabdiraxiin Ciise Caddow iyo xubno kale ayaa maanta ka qeyb galay kulan sagootin ah oo loo sameeyay tababarayaal dhanka saxaafadda ah oo ka socday Hay’adda horumarinta Warbaahinta Caalamka ee  dalka Finland ee magaceeda loo soo gaabiyo VIKAS.

Tabarayaasha ayaa dalka keenay qalab lagu horumarinayo Warbaahinta Qaranka, iyagoo tababaro siiyey qaar ka mid ah shaqaalaha Wasaaradda Warfaafinta.

Agaasimaha Guud ee Wasaaradda Warfaafinta Mudane Cabdiraxmaan Yuusuf Sheekh Al-Cadaalla ayaa ugu horeyn mahadcelin iyo bogaadin u jeediyay tababaryaasha, isla markaana ku aamanay shaqada isbedelka leh ay ka muujiyeen horumarinta qeybaha shaqaalaha iyo qalabka istuuyaasha Telefishinka Qaranka.

“Waxaan halkan u joognaa inaan u mahadcelino Walaalaheen waqtiga qaaliga ah ee ay nala qaateen, qalabkii ay noo keneen iyo tababarkii ay noo siiyeen shaqaalaha Warbaahinta Qaranka oo muddo 48 saac  ka yar laga dareemay shaashadda Telefishinka Qaranka” ayuu yiri Agaasime Cadaala.

Siiyaha Wasiirka Warfaafinta ahna Wasiir ku-xigeenka Wasaaradda Warfaafinta Mudane Cabdiraxmaan Iidan Yoonis ayaa isna mahadcelin taas la mid ah u jeediyay macaliinta iyo doorka ay ka qaateen hormarinta Warbaahinta Qaranka.

“Waxaan halkan uga mahadnayaa team-ka nooga yimid Finland, waxaan dhihi karaa waa saaxiibadeen, waa Walaalaheen sababtoo ah waxa weeyaan, wax anaga aan u baahanahay oo Telefishinka Qaranka u baahnaa ayay noo keeneen, maadaama ay ahaayeen kuwii hore noogu sameeyay Telefishinka Qaranka, aad baan ugu mahadcelineynaa” ayuu yiri Wasiir ku-xigeenka Warfaafinta.

Gabagabii munaasabadda sagootinta ah ayaa Mas’uuliyiinta Wasaaradda Warfaafinta waxay ay abaalmarino Hidaha iyo Dhaqanka Soomaaliyeed ah guddoonsiyeen dhamaan macalimiintii ka socotay dalka Finland, taasi oo ujeedku ahaa in  lagu dhiiri geliyo howsha ay ka qabteen Telefishinka Qaranka.

 

 

Did you like this? Share it:

LEAVE A REPLY

Please enter your comment!
Please enter your name here