Madaxweynaha Hirshabelle oo u mahadceliyay dadkii ka qeybqatay gargaarkii shacabka Beledweyne “SAWIRRO”

Madaxweynaha Maamulka Hirshabeelle Maxamed Cabdi Waare oo uu wehliyo Madaxweyne Ku-Xigeenka Dowlad Goboleedka HirShabeelle Cali Guudlaawe Xuseen ayaa xalay munaasabad Casho Sharaf qiimo badan ugu sameeyay Xarunta Maamulka Gobolka Hiiraan wafuud kala duwan oo ka kala socday Maamulka Puntland, Dowlad Deegaanka Soomaalida Itoobiya iyo Wafdi ka socday Bulshada iyo Ganacsatada magaalada Nairobi oo uu hormuud u ahaa Sheekh Maxamed Cabdi Umal.

Munaasabadaan ayaa waxaa goobjoog ka ahaa Guddoomiyaha Baarlamaanka Hirshabeelle Sheekh Cusmaan Barre iyo Gudoomiye Ku Xigeenka Baarlamaanka Marwo Canab Axmed Ciise qaar kamid ah Xildhibaannada Baarlamaanka, Xubnaha labada Gole ee Dowlad Goboleedka HirShabeelle, Maamulka Gobolka Hiiraan Ganacsatada iyo Qeybaha kala duwan ee bulshada magaalada Beledweyne.

Mudane Maxamed Cabdi Waare ayaa u mahad celiyay dhamaan dadka Soomaaliyeed oo si aan kala har lahayn ugu soo gurmaday dadka reer Beledweyne oo ay saameeyeen fatahaadii Webiga Shabeelle.

“Waxaan u mahadcelinayaa wafdiga ka socda Puntland oo dadaal xoog leh muujiyay iyo weliba Sheekha Maxamed Umal oo safar dheer u soo galay sidii wax loogu qaban lahaa dadka ay fatahaaddu saameeyeen iyo weliba dhakhaatiir ka timid Dowlad deegaanka Soomaalida Itoobiya.”ayuu yiri Madaxweyne Waare.

Madaxweynaha Hirshabeelle ayaa ugu baaqay Xildhibaannada ka soo jeeda Hirshabelle inay u istaagaan sidii wax loogu qaban lahaa shacabka ku dhibaateysan deegaannada Hirshabelle

Kumanaan ruux oo ka barakacay magaalada Beledweyne ayaa bilaabay inay haatan dib ugu soo laabtaan guryahooda kaddib markii ay yaraadeen biyihii fatahaadaha iyo roobabka isbiirsaday ka dhashay ee kal hore saameysay noloshooda.

 

LEAVE A REPLY

Please enter your comment!
Please enter your name here