Madaxweynaha Jubbaland oo shaaciyay inay shaqaaleysiinayaan ardayda ka jelin jebisa Jaamacadaha “SAWIRRO”

0
1705

Kismaayo, Feb, 2 2018- Madaxweynaha Dowlad Goboleedka Jubbaland Mudane Axmed Maxamed Islaam ayaa maanta ka qayb galay xaflad ay ku qalin jabinayeen Dufcaddii 8aad ee ka qalin jabisa Jaamacadda Kismaayo.

Ardaydan oo ka qalinjabiyay kuliyadaha kala duwan ee Jaamacadda waxaa ay in mudo ah ku jireen halgan waxbarasho oo wakhti dheer soo qaatay.

Madaxweynaha Dowlad Goboleedka Jubbaland oo khudbad u jeediyay ardayda ayaa diirada ku saaray marxaladaha waxbarashada dalka guud ahaan iyo fursadaha jira.

Mudane Axmed Maxamed Islaam wuxuu sheegay in Jaamacadda Kismaayo ay soo martay wakhtiyo kala duwan isla markana ay tahay Hooyada Jubbaland, maadama ay marti galisay shirkii ugu horeeyay ee Jubbaland lagu dhisay, wuxuuna xusay in Jaamacadan ay tahay mida ugu wanaagsan ee guud ahaan Gobolka isla markana ay kaga faa’iidaysan doonan in shaqo abuur loo sameeyo Ardayda ka qalinjebisa.

Madaxweynaha Jubbaland ayaa hoosta ka xariiqay in Jubbaland mudnanta koobad siinayso dadka dalka gudahiisa wax ku bartay marka laga hadlayo fursadaha shaqo si aysan dhallinyaradu dalkooda uga haajirin.

“Maanta waxaan rabaa in aan idiin sheego Jaamacadaha dalka gudahiisu waxay soo saaran jiil ku haboon in ay qabtaan shaqooyinka gudaha halkii dad dibadaha ka yimid la shaqaalaysiin lahaa” ayuu yiri Axmed Madoobe.

Maamulka Jaamacadda ayuu u sheegay in ay ka sugayaan sidii loo gaba gabayn lahaa in Jaamacaddu ay noqoto mid heer deegaan ah oo Jubbaland ay gacanta ku hayso isla markana dadka ka qalin jabiya loo qaato shaqaalaha hay’adaha Dowladda.

Waxbarashada dalka ayuu sheegay in ay soo wanaagsananayso isla markana ay rajo badan ka qabaan in ay tayada waxbarashadu noqoto sidii ay ahayd wakhtiyadii bari samaadka.

Waalidiinta iyo dhamaan dadkii gacanta ka gaystay in Ardaydan ay halkan soo gaaran ayuu Madaxweynahu u mahadceliyay isagoo ku booriyay in ay dadaalkooda sii wadaan.

—DHAMMAAD—

Did you like this? Share it:

LEAVE A REPLY

Please enter your comment!
Please enter your name here