Madaxweynaha: ‘’Kama daali doonno dagaalka, ilamaa aan ka baabi’ino Al Shabaab’’

0
980

Madaxweynaha Jamhuuriyadda Xasan Sheikh Maxamuud ayaa cambaareeyay  weerarkii argagixisada Alshabaab ku qaadeen  hoteelka Saxafi ee magaalada Muqdisho, halkaas oo ay ku laayeen mas’uuliyiin dowladeed iyo dad rayid ah.

War saxafadeed uu soo saaray ayuu madaxweynuhu ku yiri “  Waan cambaareyneynaa weerarkan, marnaba kama daali doonno dagaalka, ilamaa aan gebi ahaanba ka baabi’inno Alshabaab”

Madaxweynaha ayaa tacsi u diray shacabka Soomaaliyeed guud ahaan iyo gaar ahaan eheladii ay ka geeryoodeen mas’uuliyiiintii iyo dadkii rayidka ahaa ee ku geeryooday weerarkii aragagixisada Alshabaab ku qaadeen Hotel Saxafi.

Madaxweynaha ayaa war saxaafadeedkiisa ku yiri” Waxaan idin xaqiijinayaa in falalkan aysan ka dhigneyn Al Shabaab oo dib madaxa ula soo kaceysa. Balse cagsigeeda, waxaa falkani uu tilmaamaya sida xaalad quus ah oo soo wajahdey Al Shabaab, taas oo maalinba maalinta ka sii dambeysa sii kordheysa.Waxa xaqiiq ah in kala qeybsanaan weyn uu dhexdooda ku jiro. Ma ahan kuwo war u haya waxa ay u taagan yihiin iyo cidda ay hoos yimaadaan toona, iyagoo maciin biday inay dilaan Muslimiin aan waxba galabsan, doonayana inay ku soo baxaan bogagga hore ee wararka caalamka”.

Waxa uu madaxweynuhu sheegay in ciidammada ammaanku ay hadda si buuxda xaaladda ugu hayaan, lana sameyn doono baaritaannno qoto dheer oo la xiriira sida ay wax u dheceen iyo sida loo horumarin karo habka ay ciidammada ammaanku uga jawaab celinayaan falalka noocan oo kale ah.

Madaxweynaha Jamhuuriyadda ayaa Alle uga baryay in uu naxariistii janno ka waraabiyo dadkii aragagixisadu ku laayeen weerarkii dhacay, isagoo caafimaad qab deg deg ah u rajeeyay kuwii ku dhaawacmay.

Ugu dambeyntii waxa uu madaxweynuhu sheegay in ammaanku yahay muhimmadda koowaad ee dowladda.

 

Did you like this? Share it:

LEAVE A REPLY

Please enter your comment!
Please enter your name here