Madaxweynaha oo maanta khudbad ka jeediyey xarunta baarlamaanka

Muqdisho. Febraayo. 07,2016- Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta khudbad jeediyey fadhi aan caadi ahayn ee uu Baarlamaanka Federaalka. ku yeeshay xarunta golaha shacabka.

Madaxweyanaha oo ka hadlayey xaaladda amni ee dalka ayaaa soo hadal qaaday weerarkii ugu dambeeyey ee ay kooxda Al Shabaab ka geysatay Liido isaga oo ku tilmaamay weerarkaas inuu ahaa mid lagu laayey dad Soomaaliyeed oo aan waxba galabsan oo ay ku jiraan carruur iyo dumar, wuxuuna mar kale tacsi u diray ehelada iyo qaraabada dadkii ku dhintay weerarka, wuxuuna ALLAH uga baryey in uu caafimaad deg deg ah siiyo dadka ku dhaawacmay.

“Weerarkii ugu dambeeyay ee ay kooxdan nafla-caariga ah ka geysatay Liido ee hooyooyin , carruur iyo dad kale oo maato ah loogu laayey si cadawtinimo ah, dadkii ka dambeeyay dhacdadaasi waa argagixiso oo u bareeray laynta maatada. Waxa ay ku dambeyn doonaan shalaay, sida kuwii ku fekerka ahaa ee gacanta lagu soo dhigay iyagoo falal noocaas oo kala ah shacab u maleegayey’ ayuu yiri Madaxweynaha.

Madaxweynaha ayaa sheegay in ciidamadda amniga ay wadaan howlgallo looga hortagayo damaca kooxda nabad iyo nolal diidka ah isaga oo ku amaray hey’adaha ammaanka in dadka lagu soo qabto howlgallda socda lagu sameeyo baaritaano sida sharciga qabo, wuxuuna madaxweynaha uga digay ciidamadda in ay jirdil ku sameeyaan dadka howlgallada lagu soo qabto .

“Badbaadada Ummadda iyo jiritaanka Qarannimadeenna in aanu u istaagno waa waa jib ina wada saaran, mas’uuliyadda amniga anaga ayaa iska leh, marka waxaan rabnaa in gacan la siiyo hey’adaha ammaanka si howshooda u gutaan, sax maahan in idacadaha laga dacayadeeyo ciidankeenna u taagan sugida amniga, waa in la dhiirro geliyaa si cadowgu fursad u helin, wixii khalad ah ee dhaca, waxaa jira hab loo marsiiyo dadka madaxda u ah” ayuu yiri Madaxweynaha.

Madaxweynaha Soomaaliya Mudane Xasan Sheekh oo sidoo kale ka hadlay shilkii diyaaradeed ee todobaadkii hore ka dhacay garoonka diyaaradaha ee Adan Cade ayaa sheegay in loo hayo shaqsiyaad lagu tuhmayo inay ku lug-lahaayeen islamarkaan baaritaano ay ku socdaan.

SIdoo kale, Madaxweynaha ayaa ka hadlay horumarka dhaqaale ee daka uu ku tallaabay, isaga oo sheegay in umadda Soomaaliyeed ay horray u dhaqaaqday kuna sii socoto wadadii looga gudbi lahaa daruufaha mucayinka ah ee jira.

Ugu dambeyntii, Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa uga mahad-celiyey Baarlmaanka Federaalka Soomaaliya howllahii cuslaa oo ay soo qabteen gaar ahaan sharciyaddii ugu dambeeyey ee ay meel-mariyeen.

DHAMMAAD

LEAVE A REPLY

Please enter your comment!
Please enter your name here