Madaxweynaha oo xarigga ka jaray xarunta Seyniska iyo Tiknoolajiyadda ee Jaamacadda Ummadda Soomaaliyeed+Sawirro

Madaxweynaha J. Soomaaliya, mudane Xasan Sheekh Maxamuud ayaa maanta xarigga ka jaray xarunta Seyniska iyo Tiknoolajiyadda ee Ummadda Soomaaliyeed.

Xarunta Kuliyadda Culuumta iyo Tiknoolajiyadda ee Jaamacadda Ummadda Soomaaliyeed, muddo ka yar Lix Bilood ayeey qaadatay in dib u dayactir lagu sameeyo, taas oo aan ku imaan kaalmo caalami ah, sannado badanna waxa ay  lahayd muuqaal burbur baahsan uu ka muuqdo.

Madaxweynaha J. F. Soomaaliya, Mudane Xasan Sheekh Maxamuud, ayaa xarigga ka jaray xarunta Seyniska iyo Tiknoolajiyadda Jaamacadda Ummadda, waana kuliyaddii uu madaxweynuhu ka Qalin-jabiyey, madaxweynaha waxaa wehliyey Guddoomiyaha Jaamacadda Ummadda, Wasiirka Waxbarashada iyo Duqa Muqdisho iyo Xeer Ilaaliyaha guud ee Qaranka.

Munaasabadda, waxaa sidoo kale lagu soo dhoweynayey Ardeyda Kuliyadahaas cusub, iyadoo ay munaasabadda ka hadleen waalidiin sheegay in Jaamacadda Ummaddu ay horseed u tahay Tacliin tayo leh oo ay Ubadkoodu helaan, Sheekh Bashiir Axmed Salaad oo magaca Culimada Soomaaliyeed ku hadlayeyna waxa uu dowladdu ka codsaday in mar walba waxbarashada dalkeennu xiriirka ugu adag  looga dhigo Diinta Islaamka, si khaladdaadka loo adeegsado magaca Diinta uu meesha uga baxo
.
Guddoomiyaha Gobolka Banaadir ahna Duqa Muqdisho, Mudane Yuusuf Xuseen Jimcaale, ayaa ardeyda joogtay munaasabadda u sheegay in horumarka uu naga xigo inaan isku tashanno.
Guddoomiyaha Jaamacadda Ummadda Soomaaliyeed, Prof: Maxamed Axmed Jimcaale, ayaa sheegay in Jaamacadda Ummadda Soomaaliyeed ay sameysay horumar xooggan, xiriirrona ay la leedahay jaamacadaha adduunka ugu waa weyn qaarkood iyadoo isku tashi lagu gaaray arrimahaas, waxa uu tilmaamay in sannadka cusub ee soo socdo uu billaaban doono mashruuc lagu soo nooleynayo qeybo cusub oo ay Jaamacadda yeelan doonto.

Wasiirka Waxbarashada Soomaaliya, ayaa xoojiyey in Waxbarashadeennu ay lahaato xiriir ku saleysan Diinta Islaamka, maadaama ummaddeennu ay tahay Muslim.

Madaxweynaha Jamhuuriyadda, Federaalka Soomaaliya, Mudane Xasan Sheekh Maxamuud, ayaa ugu hambalyeeyey maamulka Jaamacadda horumarka weyn ee ay hiigsadeen, waxa uu ku dhawaaqay in la bilaabo mashruuc lagu soo nooleynayo kuliyaddii Caafimaadka ee Jaamacadda Ummadda Soomaaliyeed.

Sidoo kale Madaxweyne Xasan Sheekh Maxamuud, ayaa sheegay in la xoojinayo mashruuca Aada Dugsiyada ee ay dowladdiisu horey u bilowdey, kaas oo waxbarashada aas-aasiga ah bulshada lagu gaarsiinayo.

Madaxweynaha, waxa uu sheegay in ardeyda Jaamacadda Ummadda  dhigata ay ka kala yimaadeen guud ahaan dhulka Jamhuuriyadda Soomaaliya oo dhan, taasina ay muujineyso sida Soomaalida ay u tahay ummad midnimadeedu aysan kala maarmin.

Jaamacadda Ummadda Soomaaliyeed oo leh taariikh dheer, waxaa dib loo soo nooleeyey sannadkii 2013-kii,  hadda waxa ay leedahay laba Kambas oo waa weyn, waxaana dhigata Ardey ku dhow 2,000, waxbarashadeeduna waa lacag la’aan, waa guulaha dowladda madaxweyne Xasan Sheekh kuwooda ugu muhiimsan ee hirgalay afartii sanno ee la soo dhaafey.

unnamed (1) unnamed (2) unnamed (3) unnamed (4) unnamed (5) unnamed

Did you like this? Share it:

2 COMMENTS

  1. waa arrin lagu farxo in ummadeeni isku tashatay aana muddadaas yar ku dhisanay kuliyadii culuumta oo ah kuliyad aad u qaymo badaan.

    jaamacada ummada soomaaliyeed waa lafdhabarki wadankeena maalintii ow madaxweynaheenu ku dhawaaqay in dib loo furayna waxey aheed maalin aad qaali u ah oo soo celisay niyadeeni waana ku mahadsanaa madaxweynaheenu waayoo jaamacadaasi waa tii soo saartay hormuudka wadankeena.

    mahadsanid ayaan leenahay madaxweynaheena iyo madaxda kale ee ka qayb qaadatay dib usoo celinta doorkii jaamacadeena ummada

    shacabkeenu waa ineey dhaxda u xirtaan dib u dhiska wadankeena meelna iska dhigaan qabyaalada iyo kala qaybsanaanta si aan u gaarno caalamka naga tagay dhowrki iyo labaatanki sano een isku mashquulsaneen,si ay usoo noqoto sharaftii aan caalamka ku lahaan jirnay berisamaadki.

    DADKAYAGOOW ISKU DUUBNIBAAD DULI KAGA BAXDAAN.

    SOOMAALIYO HA GUULEYSATO
    SOOMAALIYO HA ISRAACDO

    ILLAAHEYNA SHAR IYO SHAYDAAN HANAGA XIFDIYO

LEAVE A REPLY

Please enter your comment!
Please enter your name here