Madaxweynaha Puntland oo kulamo la qaatay Qaar ka mid ah Hay’addaha Caalamiga Ah ee ka hawlgala Puntland “SAWIRRO”

0
1272

Madaxweynaha dawlad Goboleedka Puntland Dr. Cabdiweli Maxamed Cali Gaas ayaa maanta qasriga Madaxtooyada Garoowe ku qaabiley qaar ka mid ah hay’addaha caalamiga ah ee ka hawl-gala Puntland, hay’addahaas uu ku qaabilay xafiiskiisa ayaa waxaa kamid ah Relief International, SCF, SSF iyo UNICEF.

Kulankii ugu horeeyey ee Madaxweynaha Puntland la qaatay saraakiisha ka socotey Hay’addaha Relief International ayaa waxaa looga hadlay arrimo ay kamid ahaayeen kobcinta waxbarashada hablaha, taageeridda ciidamada Puntland iyo waxbarashadooda, dhismaha xarumo waxbarasho ee deegaanada fog-fog, waxaana dhammaan qodobadaasi laysla meel dhigay in sida ugu dhakhsiyaha badan loo dardar geliyo wax ka qabashadooda, iyadoo ay sheegtay hay’addu in ay gelin doonaan mashaariicdaasi lacag gaaraysa 1.5 Million.

Madaxweynaha Puntland ayaa sidoo kale xafiiskiisa kulan kula qaatay mas’uuliyiin ka socdey hay’adda SCF [Save Children Fund] oo ay kamid ahaayeen Madaxa xafiiska SCF  Soomaaliya Mr. Timothy Bishop iyo madaxa Xafiiska SCF Puntland Cabdiqafaar Cilmi Xaange, waxaana kulanka lagaga wada hadlay  mashriicda ay Puntland ka fuliyaan hay’addu, kuwaas oo ah Waxbarashada,  taageeridda caruurta danyar ta ah, Caafimaadka, Biyaha iyo Nadaafadda.

Dhinaca kale Mudane Cabdiweli Gaas oo ay wehelinayaan Madaxweyne Ku-xigeenka iyo Wasiiru Dawlaha Madaxtooyada iyo Xiriirka Caalamiga ah ee Puntland  ayaa kulan gaar ah la qaatay saraakiil ka socdey hay’adda SSF [ Somali Stability Fun], waxaana kamid ahaa saraakiisha ka socotey hay’addani madaxa xafiiska SSF Soomaaliya Vishalina Lowrance iyo madaxa Xafiiska SSF Puntland Abshir Maxamed, isla markaana waxaa kulanka looga wada hadlay arrimo ay kamid yihiin taakulaynta ciidamada Booliska Puntland, horumarinta dhalinyrada Puntland iyo biyo gelinta magaalooyinka waaweyn ee Puntland,

Ugu danbayn, kulanka Madaxweynaha Dowlad Goboleedka Puntland Dr. Cabdiweli Maxamed Cali Gaas uu la yeeshay saraakiisha kala duwan ee ka kala socdey hay’addaha Relief International, SCF iyo SSF ayaa ahaa mid ku qotomay dardargelinta mashaariicaha horumarineed ee hay’addahaasi ka fuliyaan guud ahaan sagaalka gobol ee Puntland,

=DHAMMAAD=

Did you like this? Share it:

LEAVE A REPLY

Please enter your comment!
Please enter your name here