Madaxweynaha Puntland oo shacabka Gaalkacyo ugu baaqay in guryahooda ku soo laabtaan

1098

Madaxweynaha Puntland Dr. Cabdiwali Maxamed Cali ayaa dadkii ka barakacay magaalada Gaalkacyo ugu baaqay inay ku soo laabtaan xaafadadooda, kaddib heshiis dhaqan galay oo laga gaaray colaadii Gaalkacyo.

Isagoo ka hadlayay magaalada Gaalkacyo ayuu Dr. Cabdiwali yiri “Qof gurigiisii ka barakacay ee meel cidlo ah oo geed hoostii ah uu ku dhibaateysan yahay, ciqaabteeda annaga oo masuuliyiin ah qeyb ayaan ku yeelanaynaa”.

Madaxweynaha Puntland ayaa sheegay in ay dhammaatay xaaladdii colaadda ee magaallada, islamarkaana loo baahan in nabadda iyo horumarka la wada shaqeeyo.

“Marka dhibaatadu waa inay intaa ku ekaato dadkuna ay guryahooda ku soo laabtaan, noloshoodii caadiga ahayd ay dib ugu soo laabato magaallada, dadkeeduna dad ehel ah oo wada deggan oo wada ganacsada inay noqdaan ayaan rajaynayaa”.

Dagaal ay dad badani ku dhinteen qaar kalena ku dhaawacmeen ayaa magaallada Gaalkacyo ku dhex maray Puntland iyo Galmudug, wada-dahal dhex maray labada maamul oo ay dowladda iyo dhexe, maamul-goboleedyada kale iyo beesha caalamkuba ka qeyb galeen ayaa lagu soo afjaray khilaafkii magaalada, ayadoo labada madaxweyne ee Puntland iyo Galmudug ay ka shaqeynayaan hirgelinta heshiiskii laga gaaray colaaddaasi.

Did you like this? Share it:

LEAVE A REPLY

Please enter your comment!
Please enter your name here