Madaxweynaha: ”Shacabka reer Hiiraan iyo Shabeellaha Dhexe ha ka faa’iideystaan fursadda barnaamijka baahinta xukunka” “Sawirro”

Madaxweynaha Jamhuriyadda Federaalka Soomaaliya, Mudane Xasan Sheekh Maxamuud,oo si rasmi ah uga furey magaalada Jowhar shirka maamul u sameynta gobollada Shabeellaha Dhexe iyo Hiiraan.

Maamul u sameynta labadan gobol ayaa qeyb ka ah barnaamijka baahinta xukunka ee nidaamka federaalka.

Madaxweynaha oo halkaasi khudbad ka jeediyay ayaa ugu horeyn hambalyo iyo bogaadin u diray siyaasiyiinta, odayaasha dhaqanka, ururrada bulshada iyo qeybaha kala duwan ee shacabka labada gobol sida ay ugu guuleysteen inay isugu yimaaadaan madashan muhiimka ah.

“Maanta waa maalin weyn oo muhiim ah. Waxaad hesheen fursad aad ku go’aamineysaan mustaqbalka labadan gobol. Waxaa uu Ilaahay idin ku maneystey kheyraad badan oo kala duwan. Waxaa la idin ka doonayaa inaad heshaan hoggaamiyeyaashii kheyraadkaasi shacabka uga faa’iideyn lahaa., isla markaana shaqeeya haqabtirka baahiyada kala duwan ee aad qabtaan. Waxaan idin kula dardaarmayaa si aad horumar u gaartaan inaad soo doorataan dadka aad is leedihiin waa dad daacad ah, aqoon leh, karti iyo caddaaladna isku darsadey’’, ayuu yiri Madaxweynaha.

isagoo ka hadlayey maqaamka uu yeelan doono gobolka Banaadir, ayaa Madaxweynaha waxaa uu sheegay in laga shaqeyn doono sidii arrimahaasi xal loogu heli lahaa iyadoo la raacayo dastuurka dalka u degsan.

Waxaa sidoo kale uu Madaxweynaha sheegay in nidaamka federaalka ee Soomaaliya ay qaadatey uu yahay mid shacabku ay doorteen si maamulka iyo fidinta adeegyada loo baahiyo, isla markaana doorka dowladda dhexe oo ah tan isku xirta dalka uu sii jiri doono.

Madaxweyne Xasan Sheekh Maxamuud ayaa dhanka kale ka hadley arrinta Somaliland oo uu sheegay inaan laga daali doonin xal u raadinteeda, isla markaana uu aaminsan yahay inay Soomaaliya noqoto dal ku mideysan nidaamka dimoqraadiyadda oo dhowraya xuquuqda muwaadin kasta oo Soomaaliyeed.

Madaxweynaha ka hor waxaa munaasabadda furitaanka shirka hadalo ka jeediyay Madaxweynaha Maamulka KMG ee Galmudug, Cabdikariim Xuseen Guuleed, Madaxweyne Ku Xigeenka Maamulka KMG ee Jubba , Cabdulqaadir Maxamed Luga Dheere, Wasiirka Arrimaha Gudaha, Cabdiraxmaan Maxamed Xuseen, guddoomiyeyaasha gobollada Hiiraan, Shabeellaha Dhexe, odayaasha dhaqanka iyo xubno kale.

—- DHAMMAAD——

1 7 45 98 unnamed

LEAVE A REPLY

Please enter your comment!
Please enter your name here