Madaxweyne Farmaajo oo Xalay ku hoyday Caasimadda Galmudug ee dhuusamareeb

0
1380

Madaxweynaha Jamhuuriyadda Soomaaliya mudane Maxamed C/laahi Maxamed Farmaajo ayaa xalay ku hoyday Magaalada dhuusamareeb ee Xaruunta Gobolka Galguduud ahna Caasimada dowlad goboleedka Soomaaliyeed ee Galmudug Gobolada dhexe.

Mudane Maxamed C/laahi Maxamed Farmaajo Madaxweynaha Jamhuuriyadda Soomaaliya ayaa shalay galinkii dambe gaaray Magaalada dhuusamareeb ee Caasimadda dowlad goboleedka Galmudug hal kaasoo ay ku dhaweeyeen xubno ka tirsan dowladda Federaalka Somaaliya,Galmudug, Maamulka Degmada iyo qeybaha kala duwan ee bulshada.

Madaxweynaha Jamhuuriyadda Soomaaliya Mudane Farmaajo ayaa safar dhulka ah ku tegan Magaalada dhuusamareeb ee Caasimadda Galmudug iyadoo socdaalkiisa ay ku wehlinayeen madaxweynaha dowlad goboleedka Galmudug Axmed Ducaale Geele Xaaf iyo xubno ka tirsan Golayaasha dowladda Federaalka Soomaaliya.

Madaxweynaha Jamhuuriyadda Soomaaliya mudane Maxamed C/laahi ayaa xalay kulamo kala duwan la qaatay madaxda Galmudug,qeybaha bulshada iyo qaar ka tirsan madaxda Maamulada qeybta ka ah dowladda dhexe kuwaasoo ku sugan Magaalada dhuusamareeb sida madaxweynaha Maamulka Hirshabeele Maxamed Cabdi Waare.

Maanta ayaa la filayaa in uu Madaxweynaha Jamhuuriyadda Soomaaliya kulamo kale la qaato qeybaha bulshada iyadoo halkaasi ay gaari doonaan madaxda maamulada kale sida Jubbaland ,Puntland iyo koonfur galbeed Soomaaliya kuwaas oo  goobjoog ka noqon doona dhamaystirka heshiiskii Galmudug iyo ahlusuna ee ka dhacay Magaalada Muqdisho ee Caasimada Dalka ayna garwadeen ka ahayd Dowladda Federaalka Soomaaliya iyo Jabuuti.

Madaxweynaha Jamhuuriyadda Soomaaliya mudane Maxamed C/laahi Maxamed Farmaajo ayaa gaari doona sida uu qorshu yahay Degmooyinka Cabudwaaq iyo Guraceel oo ka mid ah deegaanada dowlad goboleedka Soomaaliyeed ee Galmudug.

Socdaalka Madaxweynaha Jamhuuriyadda Soomaaliya mudane Maxamed C/laahi Maxamed Farmaajo uu ku marayo deegaanada hoos yimaada dowlad goboleedyada  Puntland iyo Galmudug gobolada dhexe ayaa qeyb ka ah dadaalada Dowladda Federaalka Soomaaliyeed ugu kuurgalayso baahiyada ay qabaan bulshada Soomaaliyeed iyo xoojinta Dowladnimada.

Safarka mudane Maxamed C/laahi Maxamed Farmaajo Madaxweynaha Jamhuuriyadda Soomaaliya ayaa baal dahaba ka galay taariikhda Dowladnimada Soomaaliya maadaama uu yahay Madaxweynihi ugu horeeyay oo safar dhulka ah ku maray afar Gobol oo ka tirsan Dalka iyadoo Shacabka Soomaaliyeed ay u dhaweeynayeen si haanan sare leh.

 

Did you like this? Share it:

LEAVE A REPLY

Please enter your comment!
Please enter your name here