Maraykanka oo ka digay weerarro  cusub oo lala beegsado Garoonka Diyaaradaha Kabul

Ciidamada Mareykanka ayaa bilaabay heerkii ugu dambeeyay ee hawsha daad –gureynta dadka  ee ka socotay  Garoonka diyaaradaha Kabul, iyagoo ka digay weerar suuragal ah in saacadaha soo socda lala beegsado Garoonka Diyaaradaha Kabul.

Safaaradda Mareykanka ee Kabul ayaa  maanta oo Axad ah soo saartay digniin cusub, iyadoo ugu baaqday muwaadiniinteeda inay degdeg uga baxaan agagaarka Garoonka Diyaaradaha Kabul sababo la xiriira khatar laga filankaro kooxaha argagixisada ah.

Safaaradda Mareykanka ayaa bayaan ay soo saartay ku sheegtay in muwaadiniinta  ay iska ilaaliyaan aadida Garoonka Diyaaradaha Kabul.

Shabakadda  POLITICO oo soo xiganaysa sarkaal ka tirsan Pentagon -ka  Mareykanka ayaa sheegtay in digniinta safaaradda Mareykanka ee Kabul ay timid kadib markii ay soo gaartay hanjabaadyo la xariira qarxiyo iyo weerarro lagu qaado meelaha ay ku suganyahiin Ciidamada Mareykanka.

Sarkaalka ayaa intaas ku daray in ku dhawaad ​​kun qof oo Rayid ah ay ku hareen Garoonka Diyaaradaha,  halka Ciidamada Mareykankana ay galeen heerkii ugu dambeeyay ee daadgureynta muwadiniintooda iyo dadka ka baxsanaya Daalibaan.