Marwada madaxweynaha oo xarun u sameysay carruurta waddooyinka ku nool

Marwada madaxweyneha Sahro Cumar Xasan ayaa furtay xarun lagu dhaqan celiyo isla markaana lagu xannaaneeyo carruurta ku nool waddooyinka magaalada Muqdisho ee loo yaqaano Derbe-Jiifka.

Magaalada Muqdisho ayaa lagu arkaa carruur Soomaaliyeed oo agoon ah ama aan waalidkood la nooleyn oo isticmaalaya waxyaabaha maanka dooriya, isla markaana habeenkii ku hoyana hareeraha waddooyinka.

Ciidanka Booliska ayaa howl-gal ay ka sameeyeen magaalada ku aruuriyay qaar ka mid ah carruurtaas oo la geeyay xarunta ay marwada madaxweynuhu u dhistay oo ku taalla degmada Cabdul-Casiis. Carrutu halkaan waxay ka heli doonaan raashin, hooy iyo daawo.

Qaar ka mid ah carruurtan ayaa sheegay inay ku faraxsan yihiin inay guryo heleen, isla markaana la daryeelayo oo ay helayaan raashin iyo dhar ay xirtaan.

Wasiirka Waxbarashada Hidaha iyo Tacliinta sare Khadar Maxamed Xasan ayaa uga mahadcelisay marwada madaxweynaha mashruucan, ayadoo tilmaantay in wax la bari doono carruurtan oo intooda badan ku jira da’dii ay wax baran lahaayeen.

Marwada madaxweynaha Soomaaliya Marwo Sahro Cumar Xasan ayaa shegtay in bulshada Soomaaliyeed uu waajib ka saran yahay inay badbaadiyaan nolosha carruurtan aan waaliska lahayn ee ku dayacan waddooyinka magaalada.

Waxay sheegtay in xaruntan lagu xannaaneyn doono dhammaan carruurta waddooyinka ku nool, si ay u helaan adeegyada ay helaan carruurta la midka ah sida waxbarasho, caafimaad, hooy iyo raashin. Dhaqaatiir ayaa ka howl galaysa aruntaan si loo ogaado xaaladda xaafimaad ee carruurtan.

Mashruucan waxaa soo dhaweeyay bulshada ku nool magaalada Muqdisho.