Masjidka ugu weyn magaalada Xudur oo maanta la daah furay “SAWIRRO”

Munaasabadaan daahfurka u ahayd Masajidka Jaamaca oo ah Masjidka ugu weyn ee magaalada Xudur oo ay soo qaban qaabiyeen Guddiga dhismaha masaajidka ayaa waxa ka qeyb galay Culimaa’udiin mas’uuliyiin Ganacsato, Odayaal, Waxgarad iyo bulshada inteeda kale.

Masaajidkaan maanta la daahfurey waxa uu dhismihiisa socday saddex sanno iyo bar oo ay ka wada qeyb qaateen dhismihiisa dadyow muxsiniin ah oo daafaha caalamka kala jooga.

Ugu horeyn munaasabadda waxa ka hadlay qaar ka mid ah guddiga oo sheegay in dhismaha Masjidka uu soo maray marxalado kala duwanaa.

Mas’uuliyiintii xafladda goob jooga ka ahayd oo u mahadceliyey guddiga ayaa ka codsaday in ay dhamaystiraan maadaama masaajidka wax ka dhiman yihiin oo ay ka mid tahay minaarada oo Astaan u ah masaajidka.

Intaa kadib waxa shahaado sharaf la guddoon siiyey guddigii u dhabar adeegay dhismaha Masaajika, iyadoo xaalad adag lagu jiro iyo Idaacadda Radio Xudur oo ah FM kuyaala magaalada Xudur ay qeyb weyn ka qaadatay dhismaha Masjidka.

Ugu dambeyn waxa loo duceeyey Imaamkii masaajidka Imaam Sheekh Cali Samboore iyo injineer Maxamed Sheekh  alle ha unaxariiste, waxana furaha Masaajidka Jaamaca lagu wareejiyay Imaamyada cusub ee masaajidka loo sameeyey.