Masuuliyiin ka tirsan wasaaradda waxbarashada Galmudug oo kormeeray xarunta imtixaanaadka ee Dhuusamareeb

Wasiir ku xigeenka wasaaradda waxbarashada, hiddaha iyo tacliinta sare ee Dowlad Goboleedka Galmudug Mudane Shariif Maxamed Khaliif oo ay wehliyeen Mas’uuliyiin ka socota hay’adda Badbaada Caruurta ( save the Children ) ayaa maanta kormeeray goobo ay ka mid yihiin xarunta waaxda Imtixaanada wasaaradda waxbarashada oo ay ka socotay saxida imtixaankii dhawaan la qaadey ee fasalka 8-aad guud ahaan dugsiyada Galmudug iyo Goobo kale oo ay ka mid yihiin dhismaha xarunta dhexe ee wasaaradda iyo Mashruuca dib u dhiska dugsigii sare ee gobolka Galgaduud oo dhamaanba ka soconaya Magaalada Dhuusamareeb ee Caasimada Galmudug.

Madaxda save & wasiir ku xigeenka ayaa kormeerkan ugu kuur galey sida ay u socdaan howlahan, iyagoo xog wareysi la yeeshay injineerada gacanta ku haya Mashaariicda dhismaha iyo macalimiinta saxayaa imtixaanka oo dhamaantoodba rajo wanaagsan ka muujiyey in mudada loogu talagaley lagu soo idleeyo howlahan.

Axmed cumar Ibrahim oo ka mid ah madaxda hay’addaha save the Children ayaa ku amaanay Wasaaradda waxbarashada Galmudug sida ay durbaba u dardar galisay mashaariicda waxbarashada oo qayb ka ahaa tiro mashaariic ah oo hey’addani taageertay isla markaana ka socda degmooyinka Galmudug.

Ugu dambeyn Wasiir ku xigeenka Wasaaradda waxbarashada, hiddaha iyo tacliinta sare ee dowlad Goboleedka Galmudug Mudane Shariif Maxamed Khaliif ayaa sharaxaad guud ka bixiyey sida ay u socoto shaqada wasaradda iyo xiliga la shaacin doono natiijada kama dambeysta ah ee imtixaanka Wasaaraddu ka qaadey ardayda fasalka 8-aad ee deegaanada Galmudug.

Kormeerkan ayaa qayb ka ah ogaanshaha iyo la socodka mashaariicda lagu tayaynayo waxbarashada Galmudug ee ka socda degmooyin dhowr ah kuwaa oo sanadkan lagu howlgalinayo tiradii ugu badneyd ee iskuulo ah.

LEAVE A REPLY

Please enter your comment!
Please enter your name here