Maxaa Hor Yaala Xildhibaannada Baarlamaanka Kalfadhigooda Ugu Dambeeya ee 8aad ,,,,Qormo

2351

Diyaar garowgii ugu dambeeyey ee loogu diyaar garoobayey furitaanka Kalfadhiga 8aad ee Baaramaanka Federaalka Soomaaliya ayaa soo gebageboobay ayadoo la dejiyey ajandayaasha Kalfadhiga iyo sida ay hor tabin ama mudnaan u kala leeyihiin waxaana qorshaha uu yahay in Madaxweynaha Jamhuuriyadda Federaalka Soomaaliya Mudane Xasan Sheekh Maxamuud uu si rasmi ah u furo Kalfadhiga ugu dambeeya ee Baarlamaanka 9aad ee Soomaaliya 10ka bishan April hadii uu Alle idmo.

Kalfadhigan 8aad oo ah Kalfadhiga ugu dambeeya Baarlamaanka 9aad ee Soomaaliya ay yeelato ayaa waxaa Golaha Shacabka hor yaala howlo badankood saameyn ku leh dalka iyo dadka waxaana ay u kala qeybsan yihiin seddex qeeybood.

1- Dhameystirka iyo ansixinta dib u eegista Dastuurka Dalka

2- Ansixinta iyo wax ka bedelka Shuruucda hada Golaha hor taala ee maray Akhrinta 1aad iyo 2aad

3-Ansixinta barnaamijka Xukuumadda ee ku saabsan doorashooyinka dalka ka dhacaya

Qeybta ugu horeysa ee koobaad oo ah dhameystirka iyo ansixinta Dastuurka dalka waa howlaha ugu waaweyn ee loo igmaday Baarlamaanka hada jira maadama uu Dastuurku yahay mid si KMG ah ay ergo ka kooban 825 xubnood oo bulshada laga soo kala xulay bulshada Soomaaliyeed, dib u eegista waxaa hada kusoo sameeyey guddiga dib u eegista dastuurka u qaabilsan Baarlamaanka Federaalka Soomaaliya iyo guddiga madaxa banaan ee dib u eegista Dastuurka .

Labada guddi oo gudanaya sida uu farayo cutubka 15aad ee Dastuurka Dalka waxa ay isla soo eegeen wax ka bedelka Cutubyo badan oo Dastuurka dalka ka mid ah ayaga oo kaashanaya Wasaaradda Dastuurka Xukuumadda Federaalka Soomaaliya waloow ay weli u harsan yihiin cutubyo kale balse 15ka bishii February ee sanadkan 2016 ayey Baarlamaanka hor keeneen wax ka bedelkii ay soo sameeyeen, halkaas ayeyna shaqada kasii amba qaadi doonaan Xildhibaannada Baarlamaanka ayadoo laga doonayo in mar kasta ay u dhaga nug laadaan aragtida dadweynaha.

Qeybta labaad ee ansixinta iyo wax ka bedelka Shuruucda hada Golaha hor taala ee maray Akhrinta 1aad iyo 2aad waa mid aad ugu sahlan Baarlamaanka oo mudo ayey guddiyada joogtada ah ee Baarlamaanka ka shaqeynayeen sharciyadan ayagoo mar kasta fiiro gaar ah u lahaa aragtida Xildhibaanka ee sharciga markaasi golaha ka doodayey waxaana qorshaha lagu howlgalayo uu yahay in la dhameystiro sharciyada Golaha hor yaala akhrin kasta oo u harsan ama codeyn waloow sharciyada ay ku jiraan mashruucyo sharci oo Golaha ka aas aasmay.

Mida ugu dambeysa oo qiyaasta qeyb ka ah howlaha adag ee hor yaala Golaha Shacabka Kalfadhiga 8aad waa ansixinta Barnaamijka Xukuumadda ee doorashooyinka dalka ka dhacaya waxaana horey u jiray qaraar Baarlamaani ah oo ku saabsanaa in Xukuumadda ay uga fadhiyaan iney Golaha hor keento sida ugu macquulsan Barnaamijkeeda ku aadan nooca doorashooyin ee dalka ka dhacaya taasi oo iyana ay suurtagal tahay in ay waqti ka qaadato golaha dhexdiisa in la isku qanciyo oo la isku raaco.

Guddoonka Baarlamaanka Federaalka Soomaaliya ayaa u asteeyey Xukuumadda Federaalka Soomaaliya in barnaamijkan ay ku hor keento Golaha Shacabka ugu dambeyn 15ka bishan April taasi oo hada ay naga xigaan maalmo kooban oo qura mana ku cada shintiriska ama jadwalka shaqo ee Baarlamaanka maalmaha ay Baarlamaanku ku qaadan doonto barnaamijkan ansixintiisa si uu sharciyad buuxda u helo.

Inkastoo howlahan looga fadhiyo Baarlamaanka Federaalka Soomaaliya in uu ku qabti hal Kalfadhi gudihiis oo ah Kalfadhigooda ugu dambeeya ayaa hadana waxaanan meesha ka marneyn in ay jiri karaan caqabado ay tan ugu horeysa tahay soo xaadirid la’aanta Xildhibaannada sida aynu ka baranay Kalfadhiyadii hore waxaana Kalfadhigan 8aad uu uga duwan yahay Kalfadhiyadii hore in go’aannada qaarkood meel marintooda ay u baahan tahay aqlabiyad xoogan seddex meelood laba tirada guud ee Golaha oo ah 184 cod in ay ku meel maraan sida wax ka bedelka Dastuurka ayadoo shaqooyin u baahan go’aanno noocaas ah aanay golahan soo marin Kalfadhiyadii hore.

Gunaanud

Waxaanan shaki ku jirin in waqtigan kooban ee halka Kalfadhi oo dastuur ahaan afar bilood ay howlahaas ku qaban karaan Baarlamaanka 9aad ee Soomaaliya sida looga arkay Kalfadhiyadii hore oo ay ku ansixiyeen 20 Sharci,26 qaraar iyo 7heshiis waase hadii aanay imaan caqabadaha ay ugu horeyso guntanka oo la waayo,

Waxaa Qoray:- C/fataax Daahir Jayte Wariyaha Radio Muqdisho,SNTV iyo Wakaaladda SONNA uga soo warama Baarlamaanka

Did you like this? Share it:

LEAVE A REPLY

Please enter your comment!
Please enter your name here