Munaasabad loogu duceeynayay Wakiilkii Akadeemiyad Goboleedka (AGA) ee Koonfur Galbeed oo lagu qabtay Muqdisho

Akadeemiye-Goboleedka Af-Soomaaliga (AGA) ayaa magaalada Muqdisho ku qabatey munaasabad ku saabsan xus iyo xusuus loo samaynayay Wakiilkii Akadeemiyada AGA ee Koonfur Galbeed Prof. Maxamed Cali Kalaay oo dhawaan ku geeriyooday magaalada Baydhabo.

Munaasabaddaasi oo ujeeddadeedu aheyd sidii loogu duceyn lahaa marxuumka geeriyooday ayaa waxaa ka soo qeyb galay Agaasimaha Wakaaladda Wararka Qaranka ee (SONNA) iyo Wargeyska Dalka Cali Cabdiqaadir Cali Agaasimaha xiriirka dowlad Gobaleedyada ee Wasaaradda Warfaafinta, Dhaqanka iyo Dalxiiska Cabdullaahi Xasan Cali, xubno ka socday Wasaaradda Waxbarashada, Guddoonka Akadeemiye-Goboleedka, madaxda Golaha Abwaannada, wakiilo ka matalayay bahda afka, qoraalka iyo akhriska, xubno ka socday ehelada marxuumka iyo marti sharaf kale oo badan.

Furitaankii munaasabaddaasi ayaa ugu horeyntii waxaa ka hadlay Guddoomiyaha Akadeemiye-Goboleedka Af-Soomaaliga Prof. Maxamed Daahir Afrax oo sheegay inuu guud ahaan Ummadda Soomaaliyeed, gaar ahaan qoyskii iyo asaxaabtii uu ka baxay Wakiilkii AGA ee Koonfur Galbeed uu uga tacsiyaynayo geeridi ku timid marxumkaasi, isaga oo caddeeyay inuu Alle uga baryayo inuu Jannadiisa ka waraabiyo.

“Prof. Kalaay waxa uu ahaa aqoonyahan qaali ah oo mudan in la xuso, maadaama uu wax badan u soo qabtay ummaddiisa, waxaana lagu xasuusan doonaa kaalintii uu ku lahaa daryeelka iyo hiilka Afka hooyo”ayuu yiri Prof Afrax oo iftiimiyay in shaqsi qiima badan uu ka baxay Akadeemiye-Goboleedka Af-Soomaaliga.

Munaasabaddaasi waxaa lagu soo bandhiggay taariikh nololeedkii Prof. Maxamed Cali Kalaay, waxaana halkaasi ka soo jeediyay Prof. Mustafa Cabdullaahi Feyruus oo ka mid ah madaxda Akadeemiye-Goboleedka, isaga oo si cilmiyaysan u faah-faahiyay heerarkii kala duwanaa ee uu soo maray marxuumka.

Wasiirkii hore Wasaaradda Hawlaha Guud Eng. Saalax Sheekh Cusmaan, La-taliyaha Wasaaradda Waxbarashada Dr. Cabdi-shakuur Sheekh Xasan Fiqi, Guddoomiyaha Golaha Abawaannada Soomaaliyeed Abwaan Xisri Dhuux iyo Agaasimaha Wakalaadda Warrarka Soomaaliyeed iyo Wargayska Dalka ee Wasaaradda Warfaafinta Cali Cabduqaadir Cali oo halkaasi ka hadlay ayaa ka tacsiyeeyay geerida Prof. Kalaay, iyaga oo soo jeediyay in si wadajir ah loogu duceeyo marxuumkaasi.

Sidoo kale waxaa munaasabaddaasi ka hadlay Prof. Fawsi Cabdi-nuur Maxamed oo ka tirsan Golaha Aqoonayahannada Koonfurta Soomaaliya, Guddoomiyaha naadiga Hillin-hayaan C/qaadir Axmed Jubba iyo Cali Max’ed Kalaay oo ku hadlyay afka ehelada ayaa ka sheekeeyay qeybo ka mid ah taariikhdii marxuumka iyo doorkii uu ku lahaa bulshada Soomaaliyeed.

Prof. Maxamed Cali kalaay waxa uu sannadkii 1953 ku dhashay magaalada Baydhabo, waxaa uu soo noqday Wasiirkii Tacliinta Sare Dawladdii Carte, waxa uu ahaa aasaasihii Jaamcadda Koonfurta Soomaaliya, waxa uu ahaa Wakiilkii Akadeemiyada AGA ee Koonfur Galbeed, noloshiisa inteeda badan waxa uu ku soo qaatey dhinacyada waxbarashada iyo daryeelka afka, dhaqanka iyo hal-abuurka Soomaaliyeed.

LEAVE A REPLY

Please enter your comment!
Please enter your name here