Nin loo heysto burburinta taariikhda magaalada Timbuktu oo ICC la geeyay

0
9106

Maxkamadda dambiyada dagaalka ee caalamka oo loo soo gaabiyo ICC ayaa maanta qaaday dacwad nooceeda tii ugu horeysay ah, Axmed Al-Faqi Al-Mahdi oo kamid ah hogaamiyeyaasha kooxda Ansaaru diin ee ka dagaalanta galbeedka Afrika gaar ahaan dalka Mali.

Axmed ayaa waxaa lagu eedeeyay in uu hogaaminayay kooxdii ka dambeeysay burburinta loo geystay dhismiyaal taariikhi ah oo ku yaalay magaalada Timbuktu ee woqooyiga dalka Mali sanadkii 2012 markii kooxda Ansaaru diin oo gacan saar la leh ururka Al-Qaacida uu la wareegay halkaas.

Axmed oo da’diisu tahay 40 sano jir, ayaa maxkamadda ka hor sheegay in uu ka xunyahay wixii dhacay waxaana uu codsaday in la cafiyo.

Waa markii ugu horey oo maxkamadda fadhigeedu yahay magaalada  Hague ee dalka Holland ay qaado kiis la xiriir burburin dhaqan. Sidoo waa markii ugu horeysay oo maxkamaddu la keeno qof ka tirsan kooxaha argagaxisada.

Dacwad oogaha maxkamadda ICC ayaa sheegay in Mr. Mahdi uu kamid ahaa kooxda Ansaaru diin oo muddo bilo ah gacanta ku heysay magaalada Timbuktu.

Qoraal ay maxkamadu soo bandhigtay ayaa waxaa lagu sheegay in Mr. Mahdi uu yahay nin kamid ah culimada diinta isla markaana dagaalyahanada kooxdaas uu ku armay in ay burburiyaan goobaha taariikhiga ah.

Waxaa lagu eedeeyay dambiyo dagaal oo ah burburinta sagaal goobood oo ay kamid yihiin madxafyo iyo Masjid.

“Runtii aad ayaa ugu xumahay , runtii waa ka shalaayay dhammaan waxyeeladii ka dhashay ficilka la igu eedeeyay”. ayuu yiri Mr. Mahdi

“Waxaa rabaa in aad waano yar siiyo dhammaan muslimiinta aduunka taas oo ah in aysan sameyn ficilkan oo kale sababtana waxaa weeye ma keeneyaan in wanaagsan,” ayuu hadalkiisa ku daray.

Dacwadiisa ayaa la soo gabagebeyn doonaa todobaadka soo socda. Waxaana muteysan doonaa xukun gaaraya 30 sano.

Kooxaha xuquuqda aadanaha ayaa soo dhaweeyay maxkamadeynta Mr. Mahdi.

Magaalada Timbuktu ayaa ah magaalo caan ah waxaana dhisimyaasha ku yaala intooda badan ay ka sameysan yihiin dhoobo iyo alwaaxyo. Waxayna aheyd xarun islaami ah intii u dhaxeysau qarniyadii  13th ilaa 17th, iyadoo hey’adda qaramada midoobay u qaabilsan dhaqan iyo cilmiga ah  ee UNESCO  ay ku dartay liista taariikhda aduunka sanadkii 1988.

 

 

Did you like this? Share it:

LEAVE A REPLY

Please enter your comment!
Please enter your name here