Qaramada Midoobay oo cambaareeysay qarixii ka dhacay Magaalada Muqdisho

Qaramada Midoobay ayaa si adag u cambaareeysay qarixii xalay ka dhacay magaalada Muqdisho gaar ahaan Maqaayada luul  Yemeni ee degmada Xamar Jajab, kaasi oo  geystay khasaaraha isugu jira dhimasho, dhaawac iyo burbur hanti.

Qoraal kooban oo kasoo baxay Xafiiska Qaramada Midoobay ee Soomaaliya aya waxa loogu tacsiyadeeyay dakii ku dhintay qaraxa, halka caafimaad loo rajeeyay kuwa ku dhaawacmay.

“Bahda Qaramada Midoobay ee Soomaaliya waxa ay si adag u cambaareynayaan weerarkii foosha xumaa ee argagaxisada Al-Shabaab ay 5-tii bishaan Maarso ka geysteen magaalada Muqdisho, waxa ayna tacsi u dirayaan qoysaska dadkii ku naf waayay weerarkaa, iyagoo u rajeynaya caafimaad degdeg ah kuwii ku dhaawacmay ayaa lagu yiri” Qoraalkan ka soo baxay Xafiiska Qaramada Midoobay ee Soomaaliya.

Booliska Soomaaliya ayaa sheegay in qaraxaas ay ku dhinteen 10 Ruux  30 kalena ay ku dhaawacmeen, waana markii labaad ee qarax lagu weeraro Maqaayada Luul Yemeni, waxaana mas’uuliyada qaraxa sheegtay arxan laawayaasha Al-Shabaab, iyaga oo sheegay in halkaasi ay aheed bartimaameedkooda.

LEAVE A REPLY

Please enter your comment!
Please enter your name here