Ra’iisul Wasaare Rooble oo bogaadiyay shaacinta Jadwalka doorashada Jubbaland, kuna baaqay in Madaxda kale ay dedejiyaan qabashada doorashada

Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble ayaa ku bogaadiyay Madaxweynaha Jubbaland iyo Guddiga Doorashada Jubbaland soo gudbinta liiska musharixiinta kuraasta Aqalka Sare iyo shaacinta jadwalka doorashada oo uu tilmaamay inay taay tallaabo aad u wanaagsan.

Ra’iisul Wasaare Rooble ayaa Madaxda dowlad Goboleedyada kale ku booriyay inay dedejiyaan qabashada doorashada, maadaama la gaaray waqtigii balanta.

“Waxaan Madaxweynaha Jubbaland Axmed Madoobe iyo Guddiga Doorashada Jubbaland ku bogaadinayaa soo gudbinta Liiska musharaxiinta Aqalka Sare ee Baarlamaanka Federaalka Soomaaliya iyo shaacinta jadwalka doorashada, doorashadu way bilaabatay, Dowlad-goboleedyada kalena waxaan ku boorrinayaa in ay dedejiyaan qabashada doorashada”. Ayuu yiri Ra’iisul Wasaare Rooble.