Ra’iisul-wsaaraha: Al-Shabab waxay doonayaan inay shacabka niyad jabiyaan

Ra’iisul-wsaaraha xukuumadda Soomaaliya mudane Cumar Cabdirashiid Cali Sharmarke ayaa sheegay in qaraxyada iyo falalka la midka ah ee ay Al-Shabaab ka fulinayaan dalka ay uga gol leeyihiin inay dadka Soomaaliyeed ka hor istaagaan inay dib u soo ceshadaan dowladnimadooda iyo nabaddooda, kaddib muddo dheer oo uu dalku dagaallo ku jiray.

Shir uu saxaafadda u qabtay ayuu ku sheegay Ra’iisul wasaruhu in tallaabo kasta oo ay kooxdu qaaddo ay cabaqad ku tahay hannaanka nabadeed iyo  dadaalka ay dadka Soomaaliyeed ugu jiraan inay dalkooda dhibaatada ka saaraan, ayadoo kooxdu ay dileyso dadka horumuudka u ah dadaalkaas, isla markaana abuureysa jawi argagax iyo niyad jab leh.

“Waxa lala beegsanayo hoteellada iyo dadka Soomaaliyeed, waa wax la rabo niyad jab in lagu rido dadka Soomaaliyeed ee rajadu gashay” ayuu yiri Raiisul-waaaruhu.

Hay’adaha ammaanka ayuu sheegay Ra’iisul-wsaarahau inay si joogto ah u wadaan howl-gallo ammaanka lagu sugayo, qaraxyada ay kooxda argagixisada ahi ka geysanayso waddanka ay yihiin kuwo  ka yar inta ay qorsheyaan, maaddaama si joogto ah ay ciidanku uga hortagaan falalka argagixiso ee kooxdan.

“Runtii maalin kasta falalka noocaas ah, waxyaabo badan oo ay ciidanku ka hortagaan ayaa jira oo aysan ciidammadu dadka la wadaagin, waad ogtihiin soonkii hore dhibaatadii dhacday ma aysan dhicin soonkaan, dadaalka ciidammada ayay ku timid, dadkana waxaan ka doonaynaa inay nala shaqeeyaan” ayuu yiri.

Kooxda Al-Shabaab ayaa Axaddii weerar is-miidaamin ah oo ay u adeegsadeen gaari ku qaaday hoteelka Jazeera ee magaalada Muqdisho, halkaas oo ay ku dhinteen 13 qof, dad kale oo badana ay ku dhaawacmeen. Weerarkaan iyo kuwo la mid ah ayay kooxda argagixisada ah ee Al-shabaab ka geystaan goobo badan oo ka mid ah  dalalka bariga Afrika.

LEAVE A REPLY

Please enter your comment!
Please enter your name here