Shaqaalaha xafiiska Ra’iisul Wasaaraha Soomaaliya oo ka qeyb galay barnaamijka Isxilqaan “SAWIRRO”

Shaqaalaha iyo Maamulka Xafiiska Ra’iisul Wasaaraha Soomaaliya ayaa maanta ka qeyb galay barnaamijka Isxilqaan ee dib loogu dhisayo xarumaha Danta guud ee ku bur buray dagaalladii dalka ka dhacay.

 

Shaqaalaha ayaa howsha isxilqaan ka fuliyay xarunta Maktabada Qaranka oo ka mid ah xarumaha lagu dhisayo barnaamijka Isxilqaan ee uu daah furay Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo, waxaana ay shaqaaluhu ku dhawaaqayeen hal ku dhigyo ay kaga hadlaan dib  u dhiska dalka.

Agaasimaha Shaqalaha xafiiska Ra’iisul Wasaaraha dalka Mudane Maxamed Jaamac Yuusuf oo shaqalaha hogaaminayay kuna hadlay afka shaqaalaha ayaa sheegay in howlwadeenada xafiisku ay laban laabi doonaan dedaalkooda  lagu dhisayo xarumaha danta guud ee dalka.

Ismaaciil Macalin Cabdullaahi oo ka mid ah mas’uuliyiinta isxilqaan ayaa ku tilmaamay shaqalaha xafiiska Ra’iisul Wasaaraha Soomaaliya inay yihiin shaqaale howl kar ah, isago geesta kale Hay’adaha kale ugu baaqay  in ay isu soo diyaariyaan sida shaqaalaha xafiiska Ra’iisul Wasaaraha Soomaaliya.

 

Did you like this? Share it: