Sida looga faa’iideysan karo waxsoo saarka dalka oo laga hadlay

Kulankan oo ku saabsanaa hormarinta wax soosaarka dalka iyo iyo Maalgashiga uu u baahan yahay dalkeena ayaa waxaa ka qeybgalay Wasiir ku-xigeenka Qorsheynta iyo Iskaashiga Caalamiga ah Cabdullahi Sheekh Cali Qaloocow, Mas’uul ka tirsan Wasaaradda Arrimaha Dibadda, Xubno ka socday Wasaaradaha Waxsoorka leh iyo khubaro Madaxbanaan oo shirka lagu casumay.

Shirka oo mudo dhowr saacadood ah socday ayaa la isku weydaarsaday talooyin muhiim ah oo la xiriira in Soomaaliya ay si wanaagsan uga faa’iideysato waxsoosaarkeeda iyo in dunida loo gudbiyo furasadaha maalgashi ee dalka uu leeyahay.

Mudane Siciid Xaaji Maxamuud ah oo ah mas’uul ka tirsan Wasaaradda arrimaha dibadda Xukuumada Soomaaliya ayaa kulanka kadib u sheegay Warbaahinta Qaranka in wadatashi laga yeesho arrimaha wax soo saarka ay tusaale u tahay in Soomaaliya ay xilligan horumar badan sameysay.

“Waxaa maanta shirkan isugu yimid Wasaarado iyo Hay’ado badan oo u yimid meeshan inay muujiyan Soomaaliya maanta inay ka maarantay tuugsi ah inay caalamka wax weydiisato iyo inay diyaar u tahay inay wax soo saarto, waxa ay soo saartana dunida u iib geyso, waxaana halkan isugu yimid Wasaaradihii waxsoosaarka lahaa iyo Wasaaradda Qorsheynta oo howsheeda tahay inay urruuriso macluumaadka ay soo gudbiyaan Wasaaradahaas si dunida loogu beec geeyo” ayuu yiri Saciid.

Wasiir ku-xigeenka Qorsheynta iyo Iskaashiga caalamiga ah ee Xukuumada Federaalka Somaaliya Mudane Cabdullahi Sheekh Cali Qaloocow oo isna la hadlay Telefishinka Qaranka ayaa xusay in shirkii maanta ay qabteen loogu talagalay soo uruurinta macluumaadka dhaqaalaha dalka iyo meelaha ku haboon wax soosaarka iyo Maalgalinta.

“Shirka maanta aan qabanay waxa uu la xirriray Soomaaliya sidii maalgashi loogu sameyn lahaa sidaa la socotaan Soomaaliya waa dal barwaaqo ah, ujeedka waxa uu yahay caalamka inaan la xiriirno si loo helo maalgashi haboon, gaar ahaana Hay’adaha iyo Wasaaradaha Waxsoosaarka , shirkan wuxuu sigaar ahmiyad ugu leeyahay waa shir loogu talagalay Wasaarada Qorsheynta iyadoo kaashaneysa Wasaarada arrimaha dibadda inay uruuriyaan macluumaadka dhaqaalaha dalka iyo meelaha ku haboon waxsoosaarka, gaar ahaan ay sameynayaan Wasaaradaha Kaluumeysiga, Beeraha, Ganacsiga iyo Warshadaha, wuxuuna gogol xaar u yahay shirar lagu qabanayo dalalka Shiinaha iyo Imaaraadka Carabta oo looga hadli doona horumarinta iyo maalgelinta Soomaaliya”ayuu yiri Prof Qaloocow.

LEAVE A REPLY

Please enter your comment!
Please enter your name here