Shirka Wasiirada Arrimaha dibedda ee Urur Goboleedka IGAD oo la soo gabo gabeeyay

1507

Ra’iisul wasaaraha xukuumadda Federaalka ah ee Soomaaliya Mudane Cumar Cabdirashiid Cali Sharma’arke ayaa soo gabo gabeeyay shirka 53-aad ee Wasiirada Arrimaha dibadda ee Urur Goboleedka IGAD, kaasi oo markii ugu horeysay lagu qabtay caasimadda Soomaaliya ee Muqdisho tan iyo bur burkii dowladdii dhexe kaddib.

Shirka oo ku saabsanaa arrimaha Soomaaliya waxaa ka qeyb-galay Wasiirrada arrimaha dibadda ee dalalka Jabuuti, Ethiopia, Kenya, Sudan, South Sudan, Uganda iyo Soomaaliya oo sanadkan martigelisay, iyadoo ka qeyb galayaasha shirka ay dowladda ku amaaneen xasilinta amniga dalka.
Ra’iisul wasaare Cumar Cabdirashiid Cali Sharma’arke oo soo xiray shirka ayaa ciidamada amniga iyo kuwa AMISOM uga mahadceliyay qabsoomidda shirka, waxaana uu intaa ku daray in dowladdu ay sii xoojin doonto horumarinta amniga iyo hirgelinta nidaamka federaalka ah.

Geba gebada shirka, heerka Wasiir arimo dibadeed ee dowladaha IGAD, isla markaana diiradda lagu saarayay horumarka illaa hadda laga gaaray, dhinacyada siyaasadda, amniga iyo dhaqaalaha Soomaaliya iyo qorshayaasha horyaalla dowladda Soomaaliya ayaa laga soo saaray War murtiyeed qodobo dhowr ah ka kooban.

Wasiirka arrimaha dibadda ee dowladda Fedealka Ethiopia, ahna shir guddoonka xiligan ee dowladaha IGAD, Tedros ayaa geba gebada shirka ka akhriyay Warmutiyeedka laga soos aaray, iyada oo qodobada laga hadlay ay ka mid ahaayeen, in dowladda Soomaaliya lagu dhiiri geliyo dhameystirka howlaha horyaalla ee hiiigsiga 2016, mideynta ciidamada, cambaareynta qaraxii ay Al-Shabaab ku qaatay xerada AMISOM, xoreynta guud ahaan gobolada, xoojinta dowladaha hoose ee maamul goboleedyada dhismaya iyo in beesha caalamka, Midowga Afrika, IGAD iyo dowladda Soomaaliya ay iska kaashaashadaan wada shaqeyntooda lagu horumarinayo Soomaaliya.

Ra’iiwasaraasha Soomaaliya, Dr. Cumar Cabdirishiid Cali shirma’arke, oo isna khudbad dhinacyo badan taabaneysa ka jeediyay shirka, ayaa ka hadlay qorshayaasha ay dooneyso in ay sanadkaan hirgeliso xukumadiisa, asiga oo IGAD uga mahadceliyay garab istaagii Soomaaliya.

Ra’iisul wasaare Cumar ayaa shaaca ka qaaday in xukuumaddiisa ay xoogga saari doonto dhameystirka dastuurka qabyada ah, gaarsiinta maamulka Federalka iyo dib u qaabeynta hey’adaha caddaaladda iyo garsoorka dalka ooo carabka ku dhuftay in baahi xooggan loo qabo.

Shirka Wasiirada Arrimaha dibadda ee Urur Goboleedka IGAD ayaa ah markii ugu horreysey oo uu Muqdisho ka dhaco muddo 29 sano kaddib, inkasta oo 2005tii lagu qabtay magaalada Jowhar ee xarunta Gobolka Shabeelaha Hoose.

Kala soco radiomuqdisho.net war-murtiyeedka shirka oo dhameystiran waxyar un kaddib

Did you like this? Share it:

LEAVE A REPLY

Please enter your comment!
Please enter your name here