Soomaaliya oo deeqdii seddexaad oo agab caafimaad ah ka heshay Dowladda Turkiga si looga hortago xanuunka Koroona feyrus “SAWIRRO”

Wasiiradda Caafimaadka iyo Daryeelka Bulshada ee Jamhuuriyadda Federaalka Soomaaliya, Dr. Fawsiya Abiikar Nuur, ayaa maanta oo Isniin ah guddoontay deeqdii seddexaad oo kaalmo caafimaad oo ka timid Jamhuuriyadda aanu walaalaha nahay ee Turkiga oo lagu soo gaarsiiyay Muqdisho labo diyaaradood milatari oo kuwa xamuulka ah si loo taageero dadaalka looga hortagayo, laguna xakamaynayo xanuunka Koroona feyrus.

Soomaaliya ayaa kaalmo agab caafimaad oo wax looga qabanayo Koroona feyrus ka kala heshay bisha cas ee Turkiga 17 April, Dowladda Turkiga 2 May, iyo maanta oo ah 4 May oo ay la wareegtay shixnado ay iska kaashadeen Dowladda Turkiga iyo hey’adaheeda oo ay ka mid tahay TİKA.

Shixnadaha kaalmooyinka agabka caafimaad oo huwanaa halkudhigga “rajo xumada waxaa ka dambeeya yididiilo weyn , mugdigana waxaa ka dambeeya qorax iftiin badan” ayaa waxaa wareejiyay Mudane Ozan PEKİN, Safiir kuxigeenka Turkiga iyo Galip YILMAZ, iskuduwaha barnaamijyada TİKA ee Soomaaliya, waxaana ka mid ahaa agabkaasi dharka isku-joogga ilaalinta leh oo uu wehliyo ookiyaale, galoofyo iyo maaskaro, waxa kale ka mid ahaa 100 sariir oo loogu talogalay qeybta daryeelka degdegga ah ee Isbitaallada la tacaala xanuunkani oo ay ku deeqday hey’adda TİKA.

Wasiiru dowlaha Arrimaha Dibadda iyo Iskaashiga Caalamiga, Mudane Cabdulqaadir Axmed-kheyr Cabdi, ayaa u mahadceliyay Madaxweynaha, Dowladda iyo Shacabka Turkiga, isagoo bogaadiyay kaalmadooda caafimaad iyo garab istaaggooda Soomaaliya, waxaana uu ku nuux nuuxsaday qotodheerida xiriirka taariikhiga ah ee qadiimiga ah ee labada dal iyo labada shacab ee walaalaha ah u dhexeeya.

Turkiga waxa uu balanqaaday in caawinaado dheeraad ah oo agab caafimaad ah uu soo gaarsiin doono Soomaaliya oo ka qeyb ah ololihiisa bani’aadannimo ee damiirka dadnimo leh ee uu deeqo caafimaad oo lagu xakamaynayo cudurka safmarka ah ee Koroona feyrus ku gaarsiiyay in ka badan 57 dal.

 

 

LEAVE A REPLY

Please enter your comment!
Please enter your name here