Soomaaliya oo diiday in mar kale dib loo dhigo dhageysiga dacwadda badda ee taala ICJ

Wasiirka Warfaafinta, Dhaqanka iyo Dalxiiska xukuumadda Soomaaliya, Cismaan Abokor Dubbe, oo maanta shir jaraa’id ku qabtay magaalada Muqdisho ayaa sheegay in Soomaaliya saaka warqad rasmi ah u dirtay maxkamadda caddaaladda adduunka ee ICJ, taas oo ay ku caddeynayso in Soomaaliya diyaar u tahay dhageysiga dacwadda la muddeeyay 15 bisha Maarso ee sanadkan.

Cismaan Dubbe, ayaa sheegay in dowladda Soomaaliya marna aqbali doonin dib u dhigis dambe oo ku saabsan dacwaddaas taala maxkamadda caddaaladda adduunka ee ICJ ee dalka Netherlands.

Wasiirka ayaa sheegay in Kenya ay mar marsiyo ka dhiganayso waxyaabo aad u liita oo ay kamid tahay waxaa nalaga xaday Map-kii aan dacwadda ku geli laheyn iyo arrimo kale.

“Dowladda Soomaaliya ma aqbali doonto dib u dhigis dambe ee dacwaddaas ah… in aad caddaaladda dib u dhigto waxay lamid tahay in aad caddaaladda diidan tahay,” ayuu yiri wasiir Dubbe.

Soomaaliya ayaa bishii August 2014, maxkamadda ICJ geysay dacwad ku saabsan sheekashada Kenya ee biyaha Soomaaliya, muddo dhowr jeer oo dib loo dhigay hadda waxaa loo madlan yahay dhageysiga dacwadda 15 bisha Maarso.

Dowladda Kenya ayaa isku day kasta sameysay sidii ay u weecin laheyd kiiskan ka furan maxkamadda ICJ, maadaama ay aaminsan tahay in Soomaaliya ka gar leedahay.

 

 

LEAVE A REPLY

Please enter your comment!
Please enter your name here