Soomaaliya oo ka qeyb-gashay shirka warbaahinta Carabta (Sawirro)

Agaasimaha Telefishinka Qaranka iyo xiriirka Warbaahinta gaarka loo leeyahay  ayaa dalka Tunisia uga qeyb-galay shirka Warbaahinta Jaamacadda Cara  oo lagu qabtay dalka Tunisia.

Shirkan oo ka dhacaya sanadkan Magaalada Xamaamaad ee Dalka Tunisiya ayaa waxaa kasoo qayb galay Agaasimeyaasha warbaahinta Dowladaha Carabta iyo Agaasimayaal ka kala socday hay’adaha madaxa bannaan ee ka jira Dalalka Carabta, Aasiya iyo Yurub.
Shirkan oo Soomaaliya uu ku  matalaayay Agaasmaha TV-ga Qaranka Soomaaliyeed Mudane Naasir Xasan Xuseen  oo uu  ku wehliyay Diblomaasi Fidow Maxamuud Fiidow, ayaa si weyn loogu soo dhoweeyey madasha shirka ee sannadkaan.

Qodobbada diiradda la saaray waxaa ka mid ahaa in la xoojiyo xiriirka warbaahinta iyo hey’adaha  kala duwan ee halkaasi isugu yimid iyo in la joogteeyo kulammadan oo kale si horumarka iyo caqabada jira looga hadlayo, taas oo wax weyn u tari doonta warbaahinta, gaar ahaan midda Soomaaliya.

shirka inta uu socdey waxaa dhacdey doorasho ku saabsaneyd madaxa ururka Warbaahinta Jaamacadda Carabta  iyo labadiisa ku xigeen, iyadoo madaxa ururka  ee sannadkaan loo doortay Mudane Maxamed Cawaash oo ka socday Dowladda aan walaalaha nahay ee Kuwait.

Mudane Maxamed Cawaash oo ka tirsan wasaaradda Warfaafinta Dalka Kuwait oo waraysi siiyay Telefishinka Qaranka Soomaaliya,  ayaa aad ugu mahad-naqay taageerada weyn ay siiyeen xubnihii ka socday Warbaahinta Soomaaliya, sidoo kalena sheegay in uu taageero u fidin doonno Warbaahnta Soomaaliya sidii ay noqdon lahayd mid awood badan oo dhan walba ka horumarsan.

Agaasimaha SNTV Naasir Xasan Xuseen oo Soomaaliya matalayey, ayaa sheegay in wax badan  ay ka faa’ideen shirka, isla markaana warbaahinta Soomaaliyeed loo muujiyey teegeero xooggan, waxa uu tilmaamay in iskaashiga warbaahinta Carabta uu ku dhisan yahay aqoon kororsi  iyo ka faa’ideysiga  nidaamka carsiga ah ee ay hadda ku shaqeeyaan warbaahinta caalamka.

“shirka inta uu socdey waxaa bar-bar socdey kulammo muhiim ah oo aan la qaatay agaasimeyaasha dhiggeyga ah ee ka socdey dalalka Carabta, kulammadaas, waxaan xoogga ku saaray in Warbaahinta Soomaaliya laga taageero dhinacyada aqoonta iyo Qalab, sida Telefishinka Qaranka iyo qeybaha kale ee warbaahinta dowladda, sidoo kale in la xoojiyo taageeridda kuwa gaar loo leeyahay, si Soomaalidu ay u hesho warbaahin ka saarta mugdiga, kana run sheegta horumarka dalkooda” ayuu yiri Naasir Xasan Xuseen agaasimaha SNTV.

Soomaaliya ayaa muddo sanado badan kaddib si toos ah u muujisay in ay dib ugu laabatay xubinnimadeedii Warbaahinta Jaamacadda Carabta oo faa’idooyin kala duwan leh, iyadoo sidoo kale Soomaaliya hey’adaheedu ay muujiyeen sida ay u koreen oo ay diyaarka ugu yihiin fulinta howlaha horumarinneed ee loo igmaday.

c c1 c2 c3 c4 c5 c6

Did you like this? Share it:

LEAVE A REPLY

Please enter your comment!
Please enter your name here