Taliska Booliska oo guryo horey looga deganaa bankiga dhexe ku wareejiyay maamulka bankiga

Taliska ciidanka booliska ayaa maanta guryo ay dowladdu lahayd oo si sharci darro ah loo deganaa dib ugu soo celisay gacanta dowladda.

Guryahana oo ku yiilay agaggaarka garoonka diyaaradaha ee Aadan Cadde gaar ahaan degmada Wadajir oo ahaa kuwa qoysas Soomaaliyeed ay si sharci darro ah u deganaayeen muddo, ayaa maanta lagu guuleystay in si rasmi ah loogu wareejiyo Madaxda bankiga dhexe ee dalka.

Taliyaha ciidanka booliska Soomaaliyeed Sareeyo Gaas Maxamed Sheekh Xasan Xaamud oo guryaha ku wareejiyay maamulka bankiga dhexe ee Soomaaliya, ayaa balan qaaday in hay’adaha dowladda marka ay u baahdaan dhulalkooda iyo guryahooda dib loogu wareejn doono.

“Taliska ciidanka booliska Soomaaliyeed, waxa uu maanta si rasmi ah guddoomiyaha bankiga dhexe ku wareejiyay xaruntii deegaanka u ahayd saraakiisha bankiga dhexe, guyahan muddadii bur burka dalka, dad ayaa si sharci darro ah u deganaa, laakiin markii ay maamulka bankiga dhexe u baahdeen waxaan ku guuleysanay in aan dib ugu celino, hay’ad waliba oo awood u yeelato in ay dhisato guryahooda waxaan naga go’an in aan dib ugu wareejino” ayuu yiri Taliyaha booliska.

Guddoomiyaha bankiga dhexe ee Soomaaliya Bashiir Ciise Cali oo isna goobta hadal kooban ka jeediyay ayaa taliska booliska uga mahadceliyay sida ay ugu soo wareejiyeen guryahaasi.

“Aad ayaan ugu faraxsanahay in maanta aan nagu soo wareejisaan guryihii bankigu lahaa, runtii inta gacan ka geysatay waan uga mahadcelineynaa dadaalka aad ku bixiseen in guryahaan dib gacanta naloogu soo celiyo” ayuu yiri Guddoomiyaha Bankiga dhexe.

Dhanka kale akadeemiye goboleedka dhaqanka, fanka iyo sugaanta ee Aagah ayaa waxa maanta shahaado sharaf guddoonsiiyeen taliyaha ciidanka booliska Soomaaliyeed, taasi oo u ku muteystay dadaalka uu boolisku ugu jiro waxbarista ciidanka booliska.

Cabdi Xaaji Goobdoon oo ka mid ah Odoyaasha akadeemid goboleedka ayaa sheegay in ay aad ugu faraxsantahay qorshaha booliska uu ku horumarinayo afka hooyo.

LEAVE A REPLY

Please enter your comment!
Please enter your name here