Taliska Ciidanka Xoogga dalka oo beeniyay in Ciidammadu ay ka baxeen deegaanka Ceelka Geelow

Taliye ku xigeenka qeybta 27-aad ee Ciidanka Xoogga dalka Janaraal Saalax Muumin Muuse (Saalax yacquub) oo wareysi gaar ah siiyay Radio Muqdisho ayaa beeniyay wararka sheegaya in Ciidamada ay ka soo baxeen deegaanno u dhaxeeya degmooyinka Balcad iyo Jowhar ee Gobolka Shabeellaha dhexe.

Taliyaha ayaa sheegay in uu hadda ku suganyahay mid ka mid ah deegaannada, qaar ka mid ah Warbaahinta madaxa banaan ay maanta sheegeen in Ciidamadu ay iskaga baxeen, kuwaasoo uu ka mid yahay deegaanka Ceelka Geelow,isagoo sheegay in ay sameeyeen ilaa 5 koontarool oo Ciidamadu ay ka sugayaan ammaanka Wadadda u dhaxeysa Jowhar iyo Balcad.

Janaraalka ayaa shacabka ku nool deegaanadaasi uga mahadceliyay sida ay ula shaqeeyaan Ciidamada,isagoo xusay in shacabku ay kusoo war geliyeen dhowr jeer kadib markii ay arkeen maleeshiyo ka tirsan argagaxisada oo Miino ku aasayay Wadadda si ay ugu waxyeeleeyaan dadka rayidka ee ku safro wadaddaas.

Janaraal Saalax Muumin Muuse ayaa tilmaamay in ay Ciidamadu isku diyaarinayaan weeraro ka dhan ah Maleeshiyada Al-shabaab ee ku dhuumaaleysanaya deegaannada farakutiriska ah ee ay kaga suganyihiin Gobolka Shabeellaha dhexe,si ay uga dul qaadaan dhibaatada ay ku haayaan Shacabka Soomaaliyeed.