Tartamaayasha Degmada Buur-hakaba oo caawa u soo gudbay wareegga labaad ee tartanka “SAWIRRO”

Tartan cilmiyeedka bisha Ramadaan oo galay sanadkii 11-aad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankiisa ugu horeeyay ee wareegga koowaad lagu daah furay Degmooyinka Heliwaa Vs Buur-hakaba oo ka kala tirsan Gobollada Banaadir iyo Baay, waxaana barnaamijka sanadkan taabagelinaya Bangiga IBS.

Tartameyaasha labada degmo ee Heliwaa Vs Buur-hakaba ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanku socday.

Heliwaa

Tartameyaasha Degmada Heliwaa ee Gobolka Banaadir ayaa waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen shan su’aal, halka ay iska qaldeen labo su’aal, maan jirin wax ka faa’iideysi ah oo ay heleen, sidaa darteed wadarta guud ee dhibcaha tartameyaasha Degmada Heliwaa ay heleen waxay noqotay toban (10) dhibcood.

Buur-hakaba

Tartamayaasha Degmada Buur-hakaba ee Gobolka Baay oo ah degmadii ku guuleysatay Tartanka sanadkii tegay ayaa waxaa dhankooda la weydiiyay todobo su’aal, waxa ay ka jawaabeen shan su’aal, iyagoo iska qalday labo su’aal, mana jirin wax ka faa’iideysi ah oo ay heleen, sidaasi darteed wadarta guud ee dhibcaha ay heleen tartameyaasha Degmada Buur-hakaba waxay noqotay toban (10) dhibcood.

Labada tartame ayaa noqday isku dhibco, waxaana sida sharciga tartanka uu dhigayo lagu daray su’aalo dheeri ah si loo kala saaro tartamayaasha degmooyinka Heliwaa iyo Buur-hakaba.

Tartamaayaasha Degmada Heliwaa oo la weydiiyay su’aashii ugu horeysay ee dheeriga ahaa ayaa iska qadalay jawaabta, taasi oo keentay in dhigooda Buur-hakaba ay ka faa’iideystaan su’aasha, balse dhankooda waxa ay ka jawaabi waayeen su’aashii la weydiiyay, Heliwaana kama aysan faa’iideysan waxayna halkaasi ay ku heleen 2– dhibcood.

Heliwaa 10– dhibcood ayay keensatay, halka Buur-hakaba ay heshay 12-dhibcood sida uu ku dhawaaqay natiijada Cabdullaahi Muxudiin Codka oo ka mid ah guddiga tartan cilmiyeedka Warbaahinta Qaranka.

Hadaba kulankii 1aad ee tartan Cilmiyeedka bisha Ramadaan ee Warbaahinta Qaranka caawa waxaa wareega xiga u soo gudbay tartamayaasha degmada Buur-hakaba ee gobolka Baay oo sanadkan difaacaneysa tartanka, ayadoo gebagebadii ay labada tartame isugu hambalyeeyeen guushaasi.

Habeen dambe oo ah habeenka 2aad ee tartan Cilmiyeedka bisha Ramadaan ee Warbaahinta Qaranka waxaa ku tartami doona degmooyinka Shibis iyo Kaaraan oo ka wada tirsan Gobolka Banaadir.

Sawir Qaade:- Khadar Cali Nuur

LEAVE A REPLY

Please enter your comment!
Please enter your name here