Tartamayaasha Degmada Boondheere oo caawa u soo gudbay wareegga labaad ee tartanka “SAWIRRO”

Tartan cilmiyeedka bisha Ramadaan oo galay sanadkii 11-aad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho ayaa waxaa caawa kulankiisa 6aad ee wareegga koowaad ku tartamay Degmooyinka Beladweyne Vs Boondheere oo ka kala tirsan Gobollada Hiiraan iyo Banaadir, waxaana barnaamijka sanadkan taabagelinaya Bangiga IBS.

Tartameyaasha labada degmo ee Beladweyne Vs Boondheere ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanku socday.

Beladweyne

Tartameyaasha Degmada Beladweyne ee Gobolka Hiiraan ayaa waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen shan su’aal, halka ay iska qaldeen labo su’aal, waxa ay ka faa’iideysteen hal su’aal oo soo hareer martay tartamayaasha Degmada Boondheere, sidaa darteed wadarta guud ee dhibcaha tartameyaasha Degmada Beladweyne ay heleen waxay noqotay toban iyo labo (12) dhibcood.

Boondheere

Tartamayaasha Degmada Boondheere ee Gobolka Banaadir ayaa waxaa dhankooda la weydiiyay todobo su’aal, waxa ay ka jawaabeen shan su’aal, iyagoo iska qalday labo su’aal, waxa ay ka faa’iideysteen hal su’aal oo soo hareer martay dhigooda Beladweyne, sidaasi darteed wadarta guud ee dhibcaha ay heleen tartameyaasha Degmada Boondheere waxay noqotay toban iyo labo (12) dhibcood.

Tartamaayaasha labada degmo ayaa noqday isku dhibco, waxaana sida uu sharciga dhigayo lagu daray su’aalo dheeraad ah, iyadoo labadii su’aal ee la weydiiyay labada ay iska qaldeen, balse Tartamaayasha Beladweyne ayaa iska qalday su’aashii kale ee la weydiiyay, taasi oo keentay in dhigooda Boondheere ay ka faa’iideystaan su’aashii soo hareer martay Beladweyne, waxaana ay si toos ah uga jawaabeen tooda, halkaasi ayayna ku heleen 4 dhibcood.

“Beladweyne 12-dhibcood ayay la timid halka Boondheere ay la timid 16-dhibcood oo ay heshay afar dhibcood oo dheeri ah, wareegga xiga Boondheere ayaa u soo gudubtay”. Ayuu yiri Ismaaciil Mukhtaar Cumar (Orange) oo ka mid ah guddiga tartan cilmiyeedka Warbaahinta Qaranka oo ku dhawaaqayay natiijada.

Hadaba kulankii 6aad ee tartan Cilmiyeedka bisha Ramadaan ee Warbaahinta Qaranka caawa waxaa wareega xiga u soo gudbay tartamayaasha Degmada Boondheere ee gobolka Banaadir, ayadoo gebagebadii ay labada tartame isugu hambalyeeyeen guushaasi.

Habeen dambe oo ah habeenka 7aad ee tartan Cilmiyeedka bisha Ramadaan ee Warbaahinta Qaranka waxaa ku tartami doona degmooyinka C/casiis iyo Kismaayo oo ka kala tirsan Gobollada Banaadir iyo Jubbada Hoose.

Sawir Qaade:- Khadar Cali Nuur

LEAVE A REPLY

Please enter your comment!
Please enter your name here