Tartamayaasha Degmada Gaalkacyo oo caawa u soo gudbay wareegga Labaad ee tartanka

Tartan cilmiyeedka bisha Ramadaan oo galay sanadkii sagaalaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa Kow iyo Tobnaad oo ah wareegga koowaad ku tartamay tartameyaasha Degmooyinka Gaalkacyo Vs Howlwadaag oo ka kala tirsan Gobollada Mudug iyo Benaadir, waxaana barnaamijka sanadkii todobaad oo xiriir ah taabagelineya Maamulka Gobolka Benaadir.

Tartameyaasha labada degmo ee Gaalkacyo Vs Howlwadaag ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac.

Gaalkacyo

Tartameyaasha Degmada Gaalkacyo ee gobolka Mudug waxaa la weydiiyey todobo Su’aal, waxa ay ka jawaabeen Shan su’aal, waxaana ay iska qaldeen Labo su’aal, waxa ay ka faa’iideysteen Saddex su’aal oo soo hareer martay tartamayaasha Degmada Howlwadaag, sidaa darteed wadarta guud ee dhibcaha tartameyaasha Degmada Gaalkacyo ay heleen waxay noqotay lix iyo toban (16) dhibcood.

Howlwadaag

Tartamayaasha Degmada Howlwadaag ee Gobolka Benaadir waxaa dhankooda la weydiiyay todobo su’aal, waxa ay ka jawaabeen Saddex su’aal, iyagoo iska qalday Afar su’aal, ma jirin wax ka faa’iideysi ah oo ay heleen, sidaasi darteed wadarta guud ee dhibcaha ay heleen tartameyaasha Degmada Howlwadaag waxay noqotay Lix (6) dhibcood.

Tartamayaasha Degmada Gaalkacyo ee Gobolka Mudug ayaa caawa u soo gudbay wareegga labaad ee tartanka.

Habeen dambe haddii uu Alle idmo oo ah habeenka Labo iyo tobnaad ee tartanka, waxaa foodda is dari doono, tartamaayasha degmooyinka Waaberi Vs Xudur oo ka kala tirsan Gobollada Benaadir iyo Bakool.

 

LEAVE A REPLY

Please enter your comment!
Please enter your name here