Tartan isboorti oo ku saabsan isdhexgalka bulsahda oo ka furmay degmada Jowhar

Tartan kubadda cagta ah oo ku saabsan soo nooleenta Isboortiga iyo Farshaxanka ayaa ka furmay magaalada Jowhar ee xarunta Gobolka Shabeelaha Dhexe, kaasi oo loo qabtay afar koox.

Ujeeddada tartankan cayaaraha kubadda cagta oo ay soo qaban qaabisay Wasaaradda Warfaafinta, Dhaqanka iyo Dalxiiska ee Xukuumadda Soomaaliya ayaa ah sidii dib loogu soo nooleen lahaa cayaaraha Gobolka iyo Farshaxanka, ayadoo ay ku tartamayeen labo koxood oo kala ah Elman iyo Bada oo ka mid ah kooxaha ka dhisan Gobolka Shabeelaha Dhexe.

Cayaartaan kubbadda cagta ee ka dhacday magaaladda Jowhar ayaa waxaa ka qeyb galay mas’uuliyiin iyo qeybaha kala duwan ee bulshada, ayadoo barbar dhac ay ku dhamaatay cayaartaasi oo lagu dhiiro gelinayay isdhexgalka bulshada iyo soo nooleynta Isboortiga iyo farshaxanka.

Guddoomiyaha xiriirka kubadda cagta degmada Jowhar Ismaaciil Cali Suubiye ka hadlay ahmiyadda tartankan cayaaraha ay u leeyihiin bulshada.

“Maanta waa maalin farxad noo ah haddii aan nahay bahda isboortiga, waxaan si qaasa ah ugu mahadcelinayaah maamulka Gobolka Shabeelaha Dhexe, oo had iyo jeer u taagan sidii u dhiri geli lahaa,waxaan kaloo u mahad celinayaa Wasaaradda Warfaafinta oo nagu dhiiri gelisay qabashada tartankan Isboorti” ayuu yiri Ismaaciil Cali.

Guddoomiyaha gobalka Shabeellaha Dhexe Cali Cabdullaahi Xuseen ayaa talaabo wanaagsan ku tilmaamay barnaamijyadan wacyi gelinta oo ay wado Wasaaradda Warfaafinta.

“Waxaan si weyn ugu amaanayaa barnaamijkani soo nooleeynta Isboortiga iyo farshaxanka, Wasaaradda Warfaafinta, dhaqanka iyo dalxiiska, sida ay ugarab taaganyihiin isboortiga, inaguna haddii aynunhay maamulka gobalka, mar walba waxaan diyaar u nahay in aan horumarino isbootiga madaama uu yahay is dhexgalka bulshada”. Ayuu yiri Guddoomiye Cali Guudlaawe.

Ugu danbeyntii mas’uuliyiinta waxa ay guddoon siiyeen agab isboorti afar koox oo ay Wasaaradda Warfaafintu, ugu tala gashay kooxaha ka dhisan degmada Jowhar ee Gobolka Shabeelaha Dhexe.