Tartan isboorti oo lagu soo gabo gabeeyay degmada Wadajir

Munaasabad lagu soo gabo gabeynayay tartan isboorti oo lagu qabta degmada Wadajir ayaa lagu qabtay xarunta degmada ee Maamulkaasi, kaasi oo ay ka qeyb galeen xubno ka socday maamulka Gobolka Banaadir, dadweyne aad u fara badan iyo marti sharaf kale, kaasi oo koob iyo abaal marino kale lagu gudoonsiinayay kooxihii ka qeyb galay tartanka.

Sidoo kale xafladda waxaa ka qeyb galay bar baarta gaashaaman ee degmada Wadajir kuwaasi oo suugaan ku soo gudbinayay horumarka dhanka Isboorti ee degmada.

Guddoomiyaha degmada Wadajir ee gobalka Banaadir Axmed Cabdulle Afrax ayaa munaasada ka sheegay in dadka reer Wadajir ay yihiin kuwa la shaqeeya maamulka degmada, isagoo dhinaca kale ugu baaqay shacabka in door muuqda ay ka qaatan nabad gelyada iyo ishaxgalka bulshada.

“Waa in aan halkaan kasii wadnaa horumarinta nabad gelyada, la shaqeyanata hey’adaha ammaanka, horumarinta Isboortiga waxbarashada iyo caafimaadka, waa in aad si wadajir ah isku kaashatan cidkasto oo horumarka degmada door ka qaata waan abaal marin doona sida maanta aan u abaal mari neyso dhalinyarada ku guuleysatay tartanka isdhaxgalka bulshada”ayuu yiri Axmed Cabdulle Afrax.

Guddoomiye ku-xigeenka siyaasada ee maamulka gobalka Banaadir Maxamed Axmed Diiriye ayaa ku bogaadiyay maamulka iyo bulshada degmada Wadajir in ay sida ay ugu wada shaqeeyan nabadda iyo bilicda degmada.

“Waxaan aad ugu faraxsanahay sida ay isku abaabuleyn  shacabka degmada Wadajir, waxaa la idin ka doonaya in aad la shaqeysan maamulkiina iyo laamaha amniga si looga guuleyso cadowga doonaya in uu qal qal geliyo amniga degmada, sidoo kale waa in aad xoojisaan is dhaxagalka Bulshada ee Degmada”ayuu yiri Guddoomiye ku-xigenka siyaasadda ee maamulka Gobolka Banaadir.

Kooxdii ku guuleystay tartankii isboorti ee degmada Wadajir iyo kuwii galay kaalimaha fiican la guddoonsiisay koob, bilado iyo lacag, taasi oo ahayd mid lagu dhiiri gelinayay dhaliyaradii ka qeyb qaadatay tartanka.

Dhinaca kale Guddoomiye ku-xigeenka Siyaasada ee maamulka gobalka Banaadir ayaa xariga ka jaray suuqa weyn Madiina ee degmada Wadajir oo dhawaan maamulka degmada ay dib u dayactir ku sameeyen.

LEAVE A REPLY

Please enter your comment!
Please enter your name here