Waa kuma Guddoomiyaha Cusub ee Bankiga Dhexe?

Golaha Wasiirrada Xukuumadda federaalka Soomaaliya ayaa kulan ay ku yeesheen Muqdisho waxa ay ku meel mariyeen magacaabista Guddoomiyaha Bankiga dhexe ee Soomaaliya.

 

Golaha Wasiirrada ayaa soo jeedinta Wasaaradda maaliyadda kaddib waxa ay cod aqlabiyad leh ku meel mariyeen in Cabdiraxmaan Maxamed Cabdullaahi oo dhaqaalaha aqoon durugsan u leh uu qabto xilka Guddoomiyaha Bankiga dhexe ee dalka.

Guddoomiyaha cusub ayaa markii xilka loo magacaabayay ka guuleystay ilaa 140 ruux oo qabashada jagadaas u taagneyd.

Bishii Janaayo ayay ahayd markii golaha Baarlamaanka ay ansixiyeen wax ka badelka qodob ku jiray xeerka Bankiga Dhexe, kaas oo sheegayay in qof aan Soomaali ahayn loo magacaabi karin xilka Guddoomiyaha Bangiga Dhexe ee Soomaaliya, balse ugu dambeyntii codeyn la galiyay ayaa 158 xildhibaan ay u codeysay wax ka badelka, halka 17 xildhibaan ay diideen.

Waxaa jiray buuq xooggan kadib markii ay soo baxeen warar sheegaya in nin ajnabi ah oo caddaan ah lagu wado in loo magacaabo Guddoomiyaha Bangiga dhexe ee Soomaaliya, Hase yeeshee saraakiil ka tirsan xafiiska Ra’isul wasaaraha iyo Madaxweynaha ayaa noo sheegay in ujeedka uu yahay in la helo xeeldheerayaal ka shaqeeya Bankiga dhexe oo ay sheegeen in qodobada ku jira sharciga uu dabar ku yahay.

Guddoomiyaha cusub ee Bankiga dhexe ee Soomaaliya Cabdiraxmaan Maxamed cabdullaahi ayaa sida ku cad qoraal ka hadlaya taariikh nololeedkiisa, wuxuu khibrad u leeyahaya arrimaha maareynta dhaqaalaha iyo Bankiyada, isagoo ka mid noqday Shaqaahaha Cashuuraha ee Wasaaradda Maaliyadda sannadkii 1986-kii.

Cabdiraxmaan ayaa waxaa inta badan noloshiisa ku qaatay kana soo shaqeeyay dalalka Norway, UK, Yemen iyo bariga Africa.

Jagada Guddoomiyaha bankiga dhexe waxaa horey u ahaay Bashiir Ciise Cali ka hor intii aanu wakhtigiisu ka dhammaan sannadkii hore, waxaana dadka jagadaasi u tartamayay oo dalbaday ka mid ahaa nin u dhashay dalka Britain oo lagu magacaabo Nigel Roberts.

Haddaba waa maxay howsha iyo xilka Bangiga Dhexe?

Bankiga dhexe oo qayb ka ah hey’adaha ugu muhiimsan hagidda hannaanka maaliyadeed ee dalka ayaa mas’uul ka ah sameynta iyo maaraynta lacagta dalka, ka shaqaysiinta hannaanka xisaabeed ee dalka, abuuridda hannaanka bixinta lacagta oo midaysan iyo Isku dubba rididda qorshaha dib-u-soo celina hantida qaranka.

Magaalada Washinton DC ee Cariga Maraykanka ayaa lagu wadaa in uu ka dhaco shir Deyn cafis ah bishan oo ay wada yeelanayaa Dowladda Soomaaliya, Bankiga Adduunka iyo Hey’adda Lacagaha Adduunka (IMF), kaasi oo ay Dowladda Soomaaliya ku dalbanayaan in Deymaha laga cafiyo, si ay u soo daabacdaan Lacago cudusb oo bedela lacagtii hore oo ku soo koobantay Kunka shallin iyo in la siin karo Deeqo ay u baahan yihiin.

W/D. Cabdullaahi Ruush

 

LEAVE A REPLY

Please enter your comment!
Please enter your name here