War-bixin:- Guulihii laga gaaray 27-Sano ka dib horumarinta Filimada Soomaaliya

Horumarinta Aflaamka Soomaaliyeed iyo in ay Filamadu noqdaan kuwo xambaarsan farriimo kala duwan oo Dadka wacyi-geliya ayay dedaal ballaaran ugu jirtaa Wakaaladda Filimada Soomaaliyeed 27- Sano ka dib.

 

Waxaa dhowaan Muqdisho lagu qabtay shir looga hadlayay sidii loo horumarin lahaa loona tayayn lahaa Aflaamta ku baxda Afka Soomaaliga, iyadoo ay jiraan dedaallo waqti badan socday balse haatan marayo meel gaba-gabo ah.

Saalax Shire Aaden (Shabeel) Agaasimaha Wakaaladda Filimada Soomaaliyeed ayaa sheegay in muddadii ay Wakaaladdu dib u billoowday howlaheeda ay sameeyeen xiriirro kala duwan, gaar ahaan Dowladaha Talyaaniga, Ingiriiska iyo Masar oo ay Soomaaliya si dhow ugu wada shaqayn jireen arrimaha Filimada.

Agaasime Shabeel, ayaa intaa ku daray in ay Dowladahaasi ka codsadeen in ay kusoo wareejiyaan muuqaalladii ay duubeen iyo xogihii ay Dalka ka hayeen, isagoo sheegay in ay haatan Gacanta ku hayaan, sida muuqaallo, qoraalla, Sawirro, Jeldiyadii Manaahijta iyo Codad kala duwan.

“Waxaannu haynaa muuqaallo, qoraallo, Sawirro iyo Codad kala duwan, waxaa kaloo ku jira Bogga Koobaad ee Buugaagtii Manaahijta wax-barashada, sida Sayniskii, Soomaaligii, Xisaabtii, waxaanan la wefaagi doonnaa hay’addii ku shaqada lahayd’, ayuu yiri Agaasime Shabeel.

Wuxuu sheegay Agaasimuhu in ay Dowladda Talyaaniga ka codsadeen inay tababarro siiyaan shaqaalaha Wakaaladda, si loo tayeeyo qibradda iyo waaya-aragnimada Dhallinyarada ku howlan soo saarista Filimada Soomaaliyeed.

Aflaamta sidda farriimaha muhiimka ah ayaa loo arkaa in ay qeyb weyn ku leeyihiin horumarinta iyo isbeddellada wacy-gelinta xambaarsan ee Bulshada qeybaheeda kala duwan, sida ay qabaan qaar ka mid ah Shacabka Soomaaliyeed.

Maki Xaaji Banaadir oo ka mid ah Fannaanto Soomaaliyeed ayaa sheegay in Filimka uu u baahan yahay aqoon iyo barasho gaar ah haddii taasi la helana ay ku filan tahay Dad yar oo fahamsan howsha ay qabanayaan.

Maxamed Abuukar oo isna ah qoraa ka howl-gala Wasaaradda warfaafinta Soomaaliya ayaa sheegay in horumarinta Aflaamta iyo shaqada Wakaaladda filimada ay yihiin Laba arrimood oo isku xiran oo aan kala maarmin.

Wuxuu sheegay in dib u howl-gelinta Wakaaladda filimada Soomaaliyeed ay tahay mid saamayn xooggan ku leh dar-dar gelinta shaqadii Filimada oo aan muddo 27- Sano ah laga samayn Filim tayo leh Dalka Soomaaliyeed.

Muyaddiin Khalliif oo ka mid ah Shaqaalihii hore ee Wakaaladda Filimada Soomaaliyeed, ayaa raja wanaagsan ka muujiyay dib u howl-gelinta Wakaaladda, wuxuuna sheegay in tallaabadani tahay billow fiican oo yididiilo leh, isagoo ugu mahad celiyay Agaasimaha Wakaaladda dib u xusuusinta leh ee uu qabtay.

Agaasimaha Wakaaladda Filimada Soomaaliyeed, Saalax Shire Aaden, ayaa sheegay in la diyaariyay sharcigii hubinta tayada iyo anshaxa Filimada, wuxuuna xusay in uu dhowaan qabsoomi doono shir lagu soo bandhigayo sharcigaasi, kaas oo ay ku casuumayaan bahda Aflaamta Soomaaliyeed ee madaxa bannaan.

W/D. Aamina Xuseen Maxamed

Did you like this? Share it:

LEAVE A REPLY

Please enter your comment!
Please enter your name here