Warbixin: Faashilka Kooxda AL-Shabaab iyo Guushii Shacabkeena

2086

Kooxda khawaariijta ah ee Al-Shabaab waxa ay utaagan yihiin dhibaataynta iyo daadinta diigga dhamaan muwaadiniinta Soomaaliyeed, iyaga oo aan u aaba yeelin nooca qof ee ay dilayaan muhiimadda uu u leeyahay Bulshada Soomaaliyeed, waana sababaha ay mar waliba u laayaan Culimada, Dhaqaatiirta, Aqoonyahanka, Waxgaradka iyo Haweenka, waxaana ficiladooda ka muuqda cadaawada fog ee ay u qabaan Ummadda Soomaaliyeed.

Kooxdaan oo markii hore Dadka iskaga dhigi jirtay kuwo danaynaya diinta Alle iyo in ay doonayaan xukun Islaami ah, ayaa hadana waxaa soo baxday in ujeedkooda dhabta ah ay ka duwan tahay dhamaan wanaagii ay markii hore ku beer laxowsan jireen dadka, maadaama ayba iyagu yihiin kuwo kusoo duulay Diinta Islaamka iyo dadkeeda. Dhacdooyin badan oo ay geeysteen kuwaas oo iskugu jira dilal iyo qaraxyo ayay Ummaddeenu ku ogaadeen dhamaan xumaanta ay la maagan tahay kooxdaan khawaariijta ah ee al-Shabaab, waana sababta keentay in maanta meel kasta ay noqdaan kuwo la raadsanayo oo dagaalkooda bulshadu u Midowdo, iyaguna ay noqdeen Tukke Canbaar leh oo Ceebtooda meel ay istaagaan waayeen.

Si kasta oo ay iskugu dayaan in ay bulshada ku beer laxowsadan waxaa aysan awoodin in dadku warkooda maqlo ama dhegeysto maadaama la ogaaday u jeedadooda dhabta ah ee ay rabaan oo ah in maalin walba dadkeena Boqolaal ka mid ah sida Xoolihii u laayaan tusaale qaraxyadii kooxdaas ay ku laysay dadkii Soomaaliyeed ee ku ganacsanayay km5 Ex Soobe 14 October 2017 iyo 03 12 2009 Shaamow oo ay ku laayeen dhaqaatiir iyo arday baratay cilmiga caafimaadka oo intooda badani ka dhashay reero dan yar ahaa markii cilmigooda iyo xoogooda ay dadkoodu ku manaafacaadi lahaayeena ay laayeen kooxda khawaariijta ah ee Al-Shabaab iyo kuwii ay ka gaysteen Liido, Maxkamadda Gobolka Banaadir iyo goobo kale oo ay ku lahaayeen dad Soomaaliyeed dhallinyaro wax ku soo bartay duruufo adag oo doonayay in dadkooda ay u adeegaan.

Dhacdooyinka xun ee layaabka leh oo kooxdaan Khawaariijta ah ee Al-Shabaab ku kacday waxaa ka mid ah in Ummaddii ay u diiden in ay cibaadeystaan iyaga oo masaajida Alle iyo madaarista Diinta lagu barto labadaba dadka ka hor Istaagaan, kuwa ku dhega adeegaya in ay tagaan goobaha cibaadada ay marar badan ku dileen sidoo kale waxaa lagu yaqaan in ay dileen Culimo mudo dheer Diinta Islaamka kasoo shaqaynaysay oo xitaa ay ku dhex dileen Masaajid gudahood, iyaga oo salaad ku jira waliba ku faana dilka Culimada iyo dhamaan Ummadda Soomaaliyeed.

Ugu danbayn waxaa muuqata in kooxdaan la gaaray dhamaadkooda isla markaana bulshadeenu diyaar u yihiin in ay iska ridaan heeryaha gumaysiga iyo u adeegayaasha cadawga Alle oo ah al-Shabaab, dadkeenuna ay u guntadeen garab is taagida dowladnimada Soomaaliyed.

DHAMAAD

W/Q Mohamed Sahardiid

Did you like this? Share it:

LEAVE A REPLY

Please enter your comment!
Please enter your name here