Warta Degmada Boondheere oo ku fatahday xaafado ka mid ah degmada “SAWIRRO”

Roobabkii ka da’ayay magaalada Muqdisho maalmahii u dambeeyay ayaa sababay fatahaad ay sameyeen bulaacadaha ku yaala magaalada Muqdisho, gaar ahaan bulaacadda Warta Boondheere ee Gobolka Banaadir  oo ku fatahday qaar ka mid ah xaafadaha Degmada Boondheere, taasi oo saameyn ku yeelatay nolosha iyo caafimaadka dadka danta yar  ee ku nool Degmada Boondheere

Bulaacadan ku taala Degmada Boondheere oo buux dhaaftay ayaa keentay in xaafado qaar ay go’doon galaan oo dadka deegaanka ay ka cabanayaan biyaha ka yimid bulacaadda inay go’doomiyeen, waxaana maamulka Degmada Boondheere oo kaashanaya kan Gobolka Banaadir ay ku xireen warta matoor loogu tala galay in uu ka saaro biyaha ku jira, iyadoo ay xiran yihiin ilaha biyo mareenada ee horay badda ugu shubi jiray.

Qaar ka mid ah dadka ku nool Degmaad Boondheere oo la hadlay Warbaahinta Qaranka ayaa sheegay inay dhibaato weyn ku qabaan biyaha wasaqda ah ee ka imaanaya Warta Boondheere.

Raxma  Maxamed  Geeddi oo ka mid ah howlwadeenada caafimaadka MCH Degmada Boondheere ayaa ka hadashay dhibaatooyinka dhinaca caafimaadka ah ee ka dhashay Warta iyo sida ay saameysay bulshada ku nool Degmada.

Qaar ka mid ah odayaasha iyo culimada ku nool Degmada ayaa codsaday in loo dhiso goobaha biyo mareenada oo biyaha roobka badda ku shubi jiray.

Gudoomiye ku-xigeenka siyaasadda degmada Boondheere Suldaan Maxamed Aweys Axmed ayaa sheegay in bulshada degmada uu saameyn ku yeeshay Warta, isagoo intaa ku daray in ka maamul ahaan ay ku dadaali doonaan sidii biyaha looga saari lahaa Warta Boondheere.

LEAVE A REPLY

Please enter your comment!
Please enter your name here