Wasaarada Maareynta Musiibooyinka oo tababar u furtay howlwadeenno ka shaqeynaya xarumaha digniinta musiibooyinka “SAWIRRO”

Wasaaradda Gargaarka iyo Maareynta Musiibooyinka Xukuumadda Federaalka Soomaaliya ayaa tababbar u furtay shaqaale iyo khubaro loogu talagalay in ay ka shaqeeyaan xarumaha bixiya digniinta musiibooyinka heer Federal iyo heer dowlad goboleed, kaasi oo lagu qabtay Muqdisho.

Tababbarkaan oo ay bixinayeen khubaro ku xeeldheer arrimaha cimilada iyo Maareynta musiibooyinka ayna iska kaashadeen Wasaaradda Gargaarka iyo Maareynta Musiibooyinka Xukuumadda Federaalka Soomaaliya iyo hay’adda cunada adduunka ee  WFP ayaa waxaa ka faa’ideysanaya Ilaa 20 ka mid ah shaqaalaha Wasaaradda Gargaarka iyo la taliyeyaasha Wasaaradda, kaasi oo loogu talagalay in ay sii tababbaraan shaqaale ka shaqeyn doona xarumaha heer Federaal iyo heer dowlad goboleed, wuxuuna socon doonaa muddo 5 cisho ah.

Saameynta xarumaha kasii digo qataraha ayaa door muuqda ka ciyaari doona in la xakameeyo khasaaraha ka dhasha musiibooyinka soo noq noqda ee dalka ka dhaca, sida abaaraha, fatahaadaha iyo duufaanada waxaana tababbarkaan oo jiil cusub ay ka faa’iideysanayaan maanta lagu qabtay magaalada Muqdisho.

Wasiirka Wasaaradda Gargaarka iyo Maareynta Musiibooyinka Xukuumadda Soomaaliya Mudane Xamsa Saciid Xamsa oo daahfuray tababarka ayaa sheegay abuurista iyo kobcinta xarumaha ka sii diga halis wadareedyada ay u sahleyso Dowladda Federaalka Soomaaliya in ay awood u yeelato in ay ka jawaabto, isla markaana maareyso Musiibooyinka.

Qaar kamid ah shaqaalaha ka faa’ideysanaya tababbarka ayaa sheegay in ay wax badan kororsadeen ayna ku faraxsanyihiin in ay dalkooda u adeegaan.

Mid ka mid tababbarayaasha oo la hadlay Warbaahinta Qaranka ayaa sheegay in uu filayo in shaqaalaha maanta u furmay tababbarku ay si wanaagsan uga faa’iideystaan si casharada Maareynta Musiibooyinka ay ugu adeegaan bulshadooda.

Tababbarka ayaa qeyb ka ah heshiis hore ay u kala saxiixdeen Wasaaradda Gargaarka Xukuumadda Soomaaliya iyo hay’adda Qaramada Midoobay u qaabilsan cunada adduunka ee marka magaceeda la soo gaabiyo loo yaqaan WFP, kaas oo dhigayay in dhammaan dowlad goboleedyada iyo gobolka Banaadir loo sameeyo xarumo sii darsa halis wadareedyada isla markaana bixiya digniinaha ka hor inta aanay qatartu soo dhawaan.

LEAVE A REPLY

Please enter your comment!
Please enter your name here