Wasaaradda Arrimaha Dibadda oo ka tacsiyadeeysay Marxuum Jeneraal Cabdi Maxamed Samatar (Cabdi dheere)

Wasiirka Wasaaradda Arrimaha Dibadda iyo Iskaashiga Caalamiga, Mudane Maxamed Cabdirisaaq Maxamuud Abuubakar, Wasiiru dowlaha Mudane Balal Maxamed Cusmaan, Wasiir kuxigeenka Mudane Maxamuud Cabdullaahi Siraaji, Xoghayaha joogtada Wasaaradda Mudane Danjire Maxamed Cali-Nuur Xaaji, Agaasimayaasha Waaxyaha, Safiirrada, Qunsulada Guud , Lataliyeyaasha Wasaaradda iyo dhammaan Saraakiisha Wasaaradda Arrimaha Dibadda iyo Iskaashiga Caalamiga waxa ay tacsi u dirayaan ehellada, asxaabta iyo Ummadda Soomaaliyeed geerida ku timid Allah u naxariistee Jeneraal Cabdi Maxamed Samatar (Cabdi dheere), oo ahaa sarkaal boolis oo ka badbaadiyay boob iyo burburin keydka waraaqaha iyo dukumintiyada Wasaaradda Arrimaha Dibadda, oo maanta oo Talaado ah, 15 June, 2021 ugu geeriyooday Caasimadda Muqdisho xaalad caafimaad darro oo la soo gudboonaatay muddooyinkii dambe ee noloshiisa.

Madaxweynaha Jamhuuriyadda Federaalka Soomaaliya Mudane Maxamed Cabdullaahi Maxamed “Farmaajo” ayaa u dalacsiiyay Cabdi Dheere darajada Jeneraal bishii July 4, 2018 kadib munaasabad lagu qabtay Aqalka Madaxtooyada “Villa Somalia”.

Marxuum Cabdi Dheere oo hore uga mid ahaa ilaaladii booliska ee dowladdii dhexe ee Soomaaliya ugu xilsaarnaa amniga xarunta Wasaaradda Arrimaha Dibadda ayaa dadaal ballaaran ku bixiyay difaacidda xarunta Wasaaradda markii ay burburtay dowladda sanadkii 1991.

Jeneraal Cabdi dheere oo dhaawac uu ka soo gaaray badbaadintiisii Arkiifiyada Wasaaradda oo yaallay dukumintiyada Wasaaradda Arrimaha Dibadda tan iyo maamulkii daakhiliga iyo wixii ka dambeeyay markii Soomaaliya ay gobonnimada qaadatay ayuu la itaal daraynayay sanadihii dambe.

Marxuumka ayaa ku geeriyooday da’da 67 sano-jir , isagoo ku dhashay Degmada Gelinsoor ee Gobolka Mudug , kuna biirray Ciidanka Booliska Soomaaliyeed sanadkii 1975, waxaana uu ifka kaga tagay labo xaas iyo 5 caruur ah oo kala ah labo hablood iyo seddex wiil.

Haddaba, annagoo ka murugeysan, kana tiiraanyeysan geerida marxuumka, ayaa waxaan Allah uga baryeynaa inuu u naxariisto, qabrigiisana nuur iyo neecaaw udgoon ku siiyo, hoygiisana ka dhigo Jannada sare ee Alfardows, qoyskiisa, ehelladiisa iyo asxaabtiisana samir iyo iimaan ka siiyo – Aamiin.

INNAA LILLAAHI WA INNAA ILEYHI RAAJICUUN

LEAVE A REPLY

Please enter your comment!
Please enter your name here