Wasaaradda waxbarashada oo Buugaagta Manhajka cusub u qeybisay Iskuullada Dowladda+Sawirro

1010

Wasiirka  xigeenka wasaaradda  waxbarashada hiddaha iyo tacliinta saree ee xukuumadda Soomaaliya, Feysal Cumar Guuleed  ayaa Maanta iskuullada Dowladda u qeybiyay  Buugaagta Manhajka  ee dhawaan ay diyaarisay wasaaradda waxbarashada Soomaaliya.

Iskuulladan oo ku yaalla Gobolka Banaadir islamarkaana ah Dugsiyadii dhawaan Dowladda ay la soo wareegtay ayaa mid mid u galay fasallada, isagoo Ardayda u qeybiyay Buugaagta cusub.

Agaasimaha waaxda Dugsiyada wasaaradda waxbarashada  Soomaaliya Muuse Maxamed Carraale, ayaa bogaadiyay Manhajka waxbarashada Dalka isagoo kula dardaarmay Waaliddiinta in ay ka shaqeeyan sidii loo kobcin lahaa garaadka Caruurtooda.

Wasiir ku xigeenka wasaaradda waxbarashada, Mudane Feysal Cumar Guuleed, ayaa sheegay in iskuullada ay la soo wareegtay Dowladda intooda badan loo qeybiyay Manhajkan cusub.

“Maanta waxaan nasiib u yeeshay in iskuulladii dhawaanay la soo wareegtay wasaaradda waxbarashada hiddaha iyo tacliinta sare inaan u qeybiyo Buugaagtii ay wax ku baran lahayeen, intooda badan waa la soo qeybiyay”ayuu yiri wasiir ku xigeenku.

Mudane, Feysal ayaa tilmaamay in wasaaradda waxbarashadu ay la soo wareegi doonto dhammaan iskuullada ay leedahay Dowladda, islamarkaana loo dhameystirayo Manhajka waxbarshada Dalka.

“ Bulshada Soomaaliyeed waxaan u sheegayaa in Maanta ay leeyihiin Manhaj mideysan oo wax lagu barayo Ardayda Soomaaliyeed”ayuu yiri Mudane, Feysal Cumar Guuleed.

Wasaaradda waxbarashada Xukuumadda Federaalka Soomaaliya ayaa dhawaan ku guuleysatay in ay la soo wareegto 24 Iskuul oo ku yaalla Gobolka Banaadir.

Did you like this? Share it:

LEAVE A REPLY

Please enter your comment!
Please enter your name here