Wasaaradda Waxbarashada XFS oo munaasabad sagootin ah u sameysay ardey deeq waxbarasho ka heshay Shiinaha “SAWIRRO”

73

Muqdisho, September, 5, 2018:- Munaasabad lagu sagootinayo 41 ardey oo deeq waxbarasho ka helay dalka Shiinaha ayaa maanta lagu qabtay magaalada Muqdisho ee caasimadda dalka.

 

Wasiiru dowlaha Wasaaradda Waxbarashada Hidaha iyo Tacliinta sare ee Soomaaliya Mudane Cabdiraxmaan Maxamuud Cabdulle ( Jaabur), xubno ka socday xafiiska Ra’iisul Wasaaraha Soomaaliya Xasan Cali Kheyre, Qunsulka safaaradda Shiinaha ee Soomaaliya,  Wang Peng, Waalidiin iyo marti sharaf kale ayaa goob joog ka ahaa munaasabadda.

Mudane Cabdiraxmaan Maxamuud Cabdulle ayaa sheegay in Xukuumadda u hogaamiyo  Ra’iisul wasaare Xasan Cali Kheyre ay dadaal ku bixisay helida deeqdan waxbarasho, isla markana tusaalo u tahay in dowladda ay ahmiyada koowaad siineyso horumarinta waxbarashada dhalinyarada Soomaaliyeed.

“Halkan waxaa maanta munaasabad sagootin ah ugu sameyneynaa 41 ardey oo ka mid ah kuwii ugu darajooyinka sareeyay imtixaankii la qaaday waxay kala yimadeen gobollada dalka iyo kuwa gobolka Banaadir,  waxay tusaale u tahay ahmiyada dowladda ay siineyso horumarinta waxbarashada dhalinyaradda Soomaaliyeed, dowladda juhdi badan ayay ku bixisay helida deeqdan waxbarasho, si cadaalad ah ayaana  lagu soo xulay” ayuu yiri Wasiiru dowlaha Wasaaradda Waxabrashada Mudane Cabdiraxmaan Maxamuud Cabdulle.

Mudane Cabdiraxmaan Maxamuud Cabdulle ayaa kula dardaarmay ardeydan, inay ka faa’ideystan fursadda ay heleen, isagoo tilmaamay in dhawaan sidan oo kale waxbarasho dibadd ah loo diri doono ardey Soomaaliyeed.

Qunsulka safaaradda Shiinaha ee Soomaaliya Wang Peng ayaa tilmaamay in tan ay tusaale u tahay xiriirka wanaagsan ee ka dhexeeya dowladaha Soomaaliya iyo Shiinaha, isla markana  horey dowladda Shiinaha ay deeq waxbarasho u siisay ardey Soomaaliyeed, kuwaasoo hadda wax ka barta Shiinaha, waxana sidoo kale u sheegay in safaaradda Shiinaha ay dowladda Federaalka Soomaaliya kala shaqeyso arrimaha Amniga, Siyaasadda, Dhaqaalaha iyo arrimaha Beni’aadanimada.

Wasaaradda Waxbarashada Xukuumadda Federaalka Soomaaliya ayaa dadaal ugu jirta sidii ardeyda Soomaaliyeed ay u heli lahayeen deeq waxbarasho oo dibadda ah ,iyadoo hadda dalka dibadiisa ay wax ka bartaan ardey Soomaaliyeed kuwaas oo deeq Waxbarasho ka helay dalalka saaxiibka lah Soomaaliya.

Did you like this? Share it:

LEAVE A REPLY

Please enter your comment!
Please enter your name here