Wasiir ku-xigeenka Warfaafinta oo daah furay tartan ciyaareed loo qabtay kooxo ka dhisan Warta Nabadda “SAWIRRO”

Daahfurka Tartan Ciyaareedka bisha Ramadaan ee Degmada Warta Nabadda ayaa waxaa ka qayb galay Wasiir ku-xigeenka Wasaaradda Warfaafinta, Senetaro ka tirsan Aqalka Saree ee dalka, Maamulka Degmada Warta Nabadda, Agaasimeyaasha Telefishinka Qaranka iyo Radio Muqdisho, xubno kale oo ka tirsan Wasaaradda Warfaafinta iyo marti Sharaf kale oo munaasabadda lagu casuumay, waxaana ugu horeyn tartankan lagu daahfuray labada naadi oo kala ah Naadiga Buulo iyo Koox ku cayaareysy magaca Warbaahinta Qaranka. Taasi oo ay u soo daawasho tageen dadweyne aad u fara badan oo ka kala yimid qaar ka mid ah Degmooyinka Gobolka Banaadir.

Guddoomiyaha Wartanabada Saynab Maxamuud Warsame Xaabseey oo furitaanka tartanka ka hadashay ayaa sheegtay in ka maamul ahaan ay garab taagan yihiin xoojinta isdhexgalka bulshada, ayna dhiiri gelinayaan dhallinyarada ka qeyb galaya tartanka.

Wasiir ku-xigeenka Wasaaraddda Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cabdiraxmaan Yuusuf Sheekh Al-Cadaala oo daah furay tartanka ayaa Maamulka Degmada Warta Nabadda uga mahadceliyay qaban qaabidda tartanka, waxaana uu ka qeyb galayaasha tartanka ku booriyay inay muujiyaan asluub wanaag.

Tartanka ayaa waxaa ka qeyb galaya 20 kooxood oo ka dhisan degmada Warta Nabadda, waxana kulankii maanta ay ku soo idlaatay 4-2 oo ay guusha ku raacday Naadiga Buulo.