Wasiir Maareeye “Sharciga saxaafadda door muhiim ah ayuu ka qaadan doonaa ilaalinta sharciga”

Wasiirka Warfaafinta dhaqanka, iyo dalxiisa ee Xukuumadda Federaalka ah ee Soomaaliya Mudane Maxamed Cabdi Xayir “Maareeye” ayaa sheegay in xeerka saxaafaddu uu door weyn ka qaadan doono ilaalinta sharciga iyo tan suxufiga.

Wasiirka Warfaafinta oo ka qeyb galay barnaamijka kulanka todobaadka ee ka baxa Radio Muqdisho iyo Telefishinka Qaranka ayaa tilmaamay in xeerka uu soo maray marxalado kala duwan, isla markaana loo qabay baahi aad u weyn.

“Sameynta xeerka Saxaafadda waxaa la soo hadal qaaday sanadkii 2001-dii, aniga markii 2005-tii la ii magacaabayna, waxaan raadiyay xogta ku saabsan sida lagu heli karo xeer lagu maamulo bahda saxaafadda, runtii qabyo qoraal ayaan xilligaas sameyney, laga soo waqtigaasi ayuu ka soo bilawday marxalado kala duwan ayuuna soo maray, laakiin Alle mahadiisa guushaaas wuu mira dhalay, in la helo sharcigana waa arrin muhiim ah” ayuu yiri Wasiirka Warfaafinta.

Wasiirka Warfaafinta, dhaqanka iyo dalxiisa mudane Maxamed Cabdi Xayir Maareeye ayaa sheegay in xeerka saxaafadda ee baarlamaanku meelmariyay uu yahay mid aad ugu muhiimsan bahda saxaafadda, isla markaana loo qabay baahi taagan.

“Rutnii markii uu golaha Wasiiradu meelmariyay sharcigan, kadib waxan u saarnay guddi ka socday bahda saxaafadda oo wax ka badal ka sameeya, waxaana markii dambe u gudbinay baarlamaanka oo meelmariyay, waxaana iminka ka warsugeynaa in Madaxweynaha Jamhuuriyadda uu saxiixo si uu u noqdo xeer dhaqan galay” ayuu yiri Wasiirka oo hadalkiisa ku daray inaysan jirin wax cabasho ah oo ka yimid bahda saxaafadda iyo tan beesha caalamka oo dhankooda gacan ka geystay sharcigan.

 

 

 

LEAVE A REPLY

Please enter your comment!
Please enter your name here