Wasiir Mustafa Dhuxulow oo ka hadlay xil wareejintii Wasaarada Warfaafinta

2217

Wasiirkii hore ee Wasaarada Warfaafinta Mudane Mustafa Sheekh Cali Dhuxulow oo ka hadlayey xil-wareejintii Wasaarada oo maanta Muqdisho ka dhacday ayaa yiri “Waxaan u mahadcelinayaa Ra’iisul Wasaare Cumar Cabdirashid Cali Sharmarke oo maanta xafladii xil wareejinta ka soo qeybgalay, tanoo na tuseysa ahmiyada ay Dowladda siineyso Wasaarada Warfaafinta. Waxaan ka cudur daaranayaa inaan maanta idinla joogin Muqdisho oo aan safar ku maqanahay,hase yeeshee waxaan kalsooni buuxda siiyey Wasiir ku xigeenka oo maanta igu matalayey xafladda xil wareejinta.”

Wasiir Mustafa ayaa intaa raaciyey oo yiri “Waxaan u rajeynayaa Wasiirka cusub ee Wasaaradda Warfaafinta Mudane Maxamed Cabdi Xayir (Maareeye), Wasiiru Dowlaha iyo Wasiir ku xigeenka, maamulka iyo shaqaalaha wasaaradda guul iyo kheyr iyo inay sii dar-dargeliyaan dadaaladii socday ee horumarkinta Warbaahinta Dalka.”

Sida warbixinta xil wareejinta lagu xusay muddadii 12ka bilood aheyd wax badan baa noo qabsoomay, iyadoo ay jireen caqabado fara badan. Waxaan marka hore u mahadcelinayaa maamulka iyo shaqaalaha wasaaradda oo si hagar la’aan ah iila shaqeeyey isla markaasna suurto geliyey inay wax badan noo qabsoomaan. Waxaana kula dardaarmayaa inay sidoo kale Wasiirka cusub ula shaqeeyaan oo howlaha qabyada noo ahaa iyo kuwo cusuba ay u hirgalaan.

Soomaaliya maanta waxey mareysaa marxalad adag oo nooga wada baahan inaan gacmaha isqabasano oo danta guud ka wada shaqeyno iyo sidii dalka loo gaarsiin lahaa doorashooyin xor ah.

Wasiir Mustafa ayaa hadalkiisa raaciyey oo yiri “Bacdamaa aan xilkii wasiirnimo maanta wareejiyey, waxaan waqtigeyga intiisa badan ku bixin doonaa sidii shacabka tabaaleysan, kuwa brakacay iyo qaxootiga soomaaliyeed ee meel waliba daadsan,dumarka,caruurta,naafada iyo kuwa aan heysan hooy iyo cunto aan u taageeri lahaa oo aan horay u sii wado howlaha xagga bani’aadamnimo.

Dhammaan hay’adaha gar-gaarka, ganacsatada Soomaaliyeed iyo dhammaan inta awoodo waxaan ka codsanayaa inay taageeraan dadkaas dhibaateysan si ay u helaan xaquuqdooda aasaasiga ah.

Waa inaan mudnaanta koowaad siinaa sidii aan u ilaalin laheyd Xaquuqda Bani’aadanimo ee shacabkeena, waana inaan u ololeynaa, una doodnaa sidii aan u joojin laheyn dhammaan tacadiyada lagu sameeyo xuquuqda muwaadiniinteena Soomaaliyeed. Waxaana iga go’an inaan kaalin mug leh ka qaato arrinkan badbaadada iyo joojinta tacadiyada xaquuql Insaanka.”

Wasiir Mustafa ayaa sheegay inuusan shaki uga jirin haddii si wadajir ah waajibaadka dastuuriga ah loo wada guto in la gaari doono horumar iyo barwaaqo. Wasiir Mustafa ayaa yiri “Dalkeena waa mid Qani ah oo leh dhammaan kheyraadka dabiiciga isla markaasna uu dalku ku yaalo meel istraateji u ah caalamka.

Si aan uga faa’iideysano kheyraadka dabiiciga ah ee ilaahey nagu maneeystay, waxaa muhiim ah inaan ka wada shaqeyno amniga iyo nabadeynta dalka, tanoo noo horseedi karta in shacabka Soomaaliyeed la gaarsiiyo adeegyada bulshada sida caafimaadka, waxbarashada iyo dhammaan adeegyada aasaasiga ah.

“Xukuumada cusub waxaa ku jira shaqsiyaad waayo aragnimo leh, dhalinyaro, gabdho, oo nooga baahan inaan siino fursad iyo kalsooni oo qof walba oo naga mid ah uu dooni lahaa in lagu taageero. Waa inaan fursad siinaa wasiirada cusub isla markaasna aan waayo aragnimadeena iyo aqoonteena ku biirino.

“Waxaan jeclaan lahaa inaan si gaar ah ugu mahadceliyo Madaxweynaha Jamhuuriyadda Federaalka Soomaaliya Mudane Xasan Sheekh Maxamud, iyo Ra’iisul Wasaarihii hore Mudane Cabdiweli Sheekh Axmed oo fursad ii siiyey inaan noqdo Wasiirka Warfaafinta & Hannuuninta Dadweynaha, waxaana hubaa inaan intii karaankeyga ah aan qabtay mudadaas, rajeynayana wasiirka iga danbeeya inuu sii kordhin doono dadaaladaas aan bilownay.

“Sidoo kale waxaan u mahadcelinayaa Madaxweynayaashii hore ee Sheekh Sharif iyo Cabdullahi Yusuf Axmed, Ra’iisul Wasaarayaashii hore Nur Xasan Xuseen (Nur Cadde) iyo Cumar Cabdirashid Cali Sharmaarke oo iyagana fursad ii siiyey xilal Wasiirnimo oo aan horey u soo qabtay sida Wasiirka Beeraha iyo Wasiirka Qorsheynta & Iskaashiga Caalamiga ah.

“Waxaan sidoo kale u mahadcelinayaa shacabka Soomaaliyeed, bulshada rayidka, iyo saaxiibadeen beesha caalamka oo aan la’aantood suurtogal noqoteen inaan sameyno horumarka baaxadda weyn leh ee Soomaaliya ay maalin walba ku tallaabsaneyso.

Wasiir Mustafa ayaa hadalkiisa ku soo gabogabeeyey “Ra’iisul Wasaare Cumar Cabdirashid Cali Sharmarke oo aan horey u soo wada shaqeyneyna waxaan u rajeynayaa guul iyo horumar iyo inuu xilkiisa u guto si wanaagsan. Ra’iisul Wasaare Cumar waxaa laga qabaa rajo aad u weyn oo laga sugayaa inuu hoggaamiyo xukuumad midnimo qaran la timaada isla markaasna dardar gelisa barnaamijka hiigsiga 2016.

Arrimaha mudnaanta leh ayaa ah dib u eegista Dastuurka, dhaqangelinta nidaamka Federaalka iyo dimoqraadiyeynta dalka loogu diyaarinayo doorashooyinka 2016. Bacdamaa waqtiga harsan uu aad u yaryahay, howsha na wada hortaalana ay badan tahay waxaa habboon inaan si wadajir ah oo hagar la’aan ah ula shaqeyno Xukuumadda si ay ula timaado waxqabad dhab ah.

Did you like this? Share it:

LEAVE A REPLY

Please enter your comment!
Please enter your name here