Wasiirada Difaaca iyo amniga oo baarlamaanka su’aallo lagu weydiiyay

Furitaanka kulanka baarlamaanka ee maanta waxaa Xildhibaanada loogu akhriyay mooshinka loogu yeeray Wasiirada Amniga iyo Gaashaandhigga ee Dowladda Soomaaliya, waxaana mooshinkaasi akhrisay Xildhibaan Khadiijo Maxamed Diiriye oo ka mid ahayd Xildhibaanada ku saxiixnaa mooshinka oo sheegtay in mooshinka uu ku saabsanaa u yeeridda Wasiirada Amniga, Cadaaladda, Gaashaandhigga, iyo taliyeyaasha ciidamada qalabka sida oo ka tirsan guddiga amniga Qaranka.

Mudaneyaasha ayaa bilaabay su’aalo weydiinta Wasiirada Amniga iyo Difaaca ee Xukuumadda Soomaaliya, iyadoo su’aalaha intoo badan ay Xildhibaannadu weydiinayeen Wasiirka Amniga, kuwaasi oo ku saabsanaa amniga Xildhibaannada iyo Xasaanadda ah leeyihiin.

Wasiirka amniga ee Xukuumadda Soomaaliya Mudane Cabdirisaaq Cumar Maxamed ayaa sheegay inaysan jirin wax amar ah oo ay Wasaaraddu ku bixisay in la baaro Xildhibaannada, waxaana uu intaa ku daray in haddii ay jiraan waxqalad ah oo mudanayaasha lagula kacay wax laga qaban doono.

Guddoomiyaha baarlamaanka Federaalka ah ee Soomaaliya Mudane Maxamed Sheekh Cismaan Jawaari oo gabo gabadii ka hadlay kulanka baarlamaanka ayaa Xildhibaannada ka dalbaday in marka ay tegaan goobaha amniga lagu sugayo ay ciidamada amniga gacan ku siiyaan gudashada waajibaadka loo idmaday, waxaana uu dhanka kale hoosta ka xariiqay inay tahay laguma xadbaan xasaanadda Xildhibaannada.

44 mudane ayaa is qoray inay su’aalo weydiiyaan Wasiirka amniga gudaha, waxaana maanta fursad u helay inay su’aalo weydiiyaan 37, iyadoo Xildhibaannada haray ay markale su’aalo weydiin doonaan waqti kale, kuwaasi oo ku saabsan arrimaha ammaanka.

LEAVE A REPLY

Please enter your comment!
Please enter your name here